"Formula 1" Bakı turizminə nə qazandırır? – Ekspert DANIŞDI  

Dünyanın ən nüfuzlu avtoidman yarışlarından biri olan "Formula 1" hər il olduğu kimi, bu il də Bakı şəhərində böyük coşqu və həyəcanla qarşılanır. Azərbaycan Qran-prisi paytaxtımızın beynəlxalq arenada tanınmasında və turizm potensialının nümayiş etdirilməsində mühüm rol oynayır. Yarış günlərində ölkəmizə gələn xarici qonaqların, eləcə də regionlardan gələn yerli azarkeşlərin axını şəhərin iqtisadi və sosial həyatına güclü dinamizm qatır. Hotellər, restoranlar, nəqliyyat və digər xidmət sahələri bu ərəfədə maksimum yük altında işləyərək yüksək qazanc əldə etmək imkanı qazanırlar. 

Lakin hər kütləvi tədbirdə olduğu kimi, paytaxtda keçirilən bu möhtəşəm yarış da bəzi logistik çətinlikləri və nəqliyyat sıxlıqlarını bərabərində gətirir. Xüsusilə şəhərin mərkəzi küçələrinin və trekətrafı ərazilərin bağlanması sürücülər və piyadalar üçün gündəlik hərəkətdə müəyyən maneələr və tıxaclar yaradır. Alternativ yolların seçilməsi və ictimai nəqliyyatın gücləndirilmiş iş rejiminə keçməsinə baxmayaraq, yol-nəqliyyat infrastrukturu bu dövrdə ciddi sınaqla üzləşir. Bu cür qısamüddətli tədbirlərin turizm sektoruna uzunmüddətli və davamlı töhfə verməsi üçün hansı mexanizmlərin tətbiq edilməsi isə cəmiyyəti və mütəxəssisləri düşündürən əsas məsələlərdəndir.

Məhz bu mövzu ilə əlaqədar Oxu24.com-a açıqlama verən Azərbaycan Turizm Agentlikləri Assosiasiyasının Turistlərə Maarifləndirmə və Dəstək şöbəsinin rəhbəri Rəhman Quliyev mühüm məqamlara toxunub.

— “Formula 1” yarışının Bakıda turizm və xidmət sektoruna təsiri nə qədər davamlıdır və yarış günlərində artan turist axınından hotellər, restoranlar və digər xidmət sahələrinin daha çox gəlir əldə etməsi üçün hansı imkanlardan istifadə etmək olar?

Rəhman Quliyev bildirib ki, "Formula 1" yarışının Bakıda keçirilməsi şəhərin turizm və xidmət sektoruna xüsusilə yarış günlərində ciddi dinamizm gətirir. Xarici azarkeşlərlə yanaşı, ölkənin müxtəlif bölgələrindən Bakıya gələn yerli turistlərin sayı da artır və bu, hotellər, restoranlar, nəqliyyat və əyləncə xidmətlərinə tələbi yüksəldir:

“Lakin bu təsirin davamlı olması üçün yarışın yaratdığı turist marağını yalnız bir neçə günlə məhdudlaşdırmamaq vacibdir. Bunun üçün Formula 1 izləməyə gələn turistlərə Bakı və Azərbaycanın digər turizm istiqamətlərini əhatə edən əlavə turlar, şəhər gəzintiləri və xüsusi turizm paketləri təqdim oluna bilər”.

Assosiasiya rəsmisinin sözlərinə görə, hotellər və restoranlar yarış günlərinə uyğun xüsusi paketlər və xidmətlər hazırlamaqla turistlərin şəhərdə qalma müddətini uzatmağa çalışa bilərlər. 

Eyni zamanda, ekspert əlavə edib ki, yerli sahibkarların tədbirin yaratdığı yüksək tələbatdan daha çox faydalanması üçün rəqəmsal marketinq, onlayn satış və beynəlxalq platformalarda tanıtım imkanlarından daha geniş istifadə edilməlidir. Bu yanaşma "Formula 1"in iqtisadi və turizm təsirinin yalnız yarış həftəsonunda deyil, daha uzun müddət ərzində hiss olunmasına şərait yarada bilər.

Qeyd etmək lazımdır ki, "Formula 1" sadəcə idman yarışı deyil, həm də ölkənin turizm potensialının dünyaya nümayiş etdirilməsi baxımından strateji əhəmiyyət daşıyan qlobal platformadır. Yarış günlərində yaranan müvəqqəti nəqliyyat çətinliklərinin peşəkar şəkildə idarə olunması və turizm xidmətlərinin çeşidinin artırılması paytaxtımızın bu sahədəki imkanlarını daha da gücləndirir. Mütəxəssislərin tövsiyə etdiyi kompleks yanaşmaların tətbiqi sayəsində həm yerli sahibkarların gəlirləri artır, həm də Azərbaycanın turizm brendinin uzunmüddətli tanıdılması uğurla təmin edilir.

Çimnaz Telmanqızı

Həmçinin oxuyun

“Eşref Tek”in tərəf müqabili o olacaq 

Son dərəcə sərt qış qapıdadır 

Azərbaycanda molla arvadını qətlə yetirdi

Milli Məclis mühüm qərarlar QƏBUL EDİB -SİYAHI