“Şəkərsiz” deyib aldadırlar! – Meyvə şirələrindəki gizli təhlükə ilə bağlı XƏBƏRDARLIQ  

Mağaza rəflərində “100% təbii”, “şəkərsiz”, “dietik” və “light” kimi ifadələrlə təqdim olunan meyvə şirələri istehlakçıların diqqətini cəlb edir. Lakin məhsulun üzərində bu ifadələrin yazılması onun avtomatik olaraq sağlam olduğu anlamına gəlmir.

Xüsusilə emal olunmuş meyvə şirələrinin tərkibində şəkərin əvəzinə müxtəlif şirinləşdiricilərdən istifadə oluna bilər. Buna görə də mütəxəssislər istehlakçılara məhsul seçərkən yalnız qablaşdırmanın üzərindəki reklam xarakterli ifadələrə deyil, tərkib hissələrinə və qida dəyərinə diqqət yetirməyi tövsiyə edirlər.

Mövzu ilə bağlı Oxu24.com-a açıqlama verən Qida Təhlükəsizliyi Hərəkatının rəhbəri, sağlam qidalanma mütəxəssisi Məhsəti Hüseynova bildirib ki, meyvə şirəsi alarkən ilk növbədə məhsulun etiket məlumatları diqqətlə oxunmalıdır.

“100% təbii” ifadəsi hər şeyi göstərmir”

Mütəxəssis qeyd edib ki, qablaşdırmanın üzərində “100% təbii meyvə şirəsi” yazılması məhsulun tərkibində şəkər və ya şəkər əvəzedicilərinin olmadığı anlamına gəlmir.

“İstehsalçılar məhsuldan asılı olaraq aspartam, sukraloza, saxarin kimi şirinləşdiricilərdən, yaxud steviya bitkisinin tərkibindəki steviol qlükozidlərindən istifadə edə bilərlər. Bu maddələrin adları etiketdə müxtəlif formada qeyd oluna bilər. Buna görə məhsulun tərkibi mütləq yoxlanılmalıdır”. 

Onun sözlərinə görə, emal olunmuş meyvə şirələrindənsə meyvənin özünü istehlak etmək daha məqsədəuyğundur.

“Şəkərsiz”, “diet” və “light” yazılarına aldanmayın”

Məhsəti Hüseynova bildirib ki, istehlakçılar məhsul seçərkən qablaşdırmanın üzərindəki “şəkərsiz”, “diet”, “light” və “fit” kimi ifadələrə deyil, məhsulun ümumi qida dəyərinə diqqət yetirməlidirlər.

“Əsas məqsəd şəkəri başqa bir şirinləşdirici ilə əvəz etmək deyil, gündəlik şəkər qəbulunun norma həddini aşmamasıdır”, – deyə mütəxəssis vurğulayıb.

O əlavə edib ki, məhsulun üzərində “şəkərsiz” yazıldığı halda tərkibində şəkər və ya şirinləşdirici maddə göstərilirsə, bu məsələ istehlakçı hüquqları baxımından araşdırılmalıdır.

Mütəxəssis alıcılara meyvə şirəsi alarkən məhsulun tərkibini diqqətlə oxumağı və marketinq xarakterli ifadələrə deyil, real qida göstəricilərinə əsaslanmağı tövsiyə edib.

Çimnaz Telmanqızı

Həmçinin oxuyun

Şad xəbər gəldi: Ödənişlərin 75 faizi silinir 

Nazirlər Kabinetindən pensiyalarla bağlı QƏRAR:Bu gündən qüvvəyə MİNİR

Onlara yüksək vəzifə verildi - ADLAR

Məleykə Əsədovaya ağır itki - FOTOLAR