Pediatrdan valideynlərə sərt xəbərdarlıq: “Uşaqlara qarpız verməyin” 

"Uşaqlara qarpız verməyin. Mövsümündən əvvəl satışa çıxarılan qarpızlar uşaqlar üçün risk yarada bilər".

 Oxu24.com bu sözləri Musavat.com-a açıqlamasında pediatr Vaqif Qarayev deyib.  Həkimin sözlərinə görə, yay mövsümündə uşaqlarda müşahidə olunan mədə-bağırsaq pozğunluqları çox vaxt məhz qarpızla əlaqəli olur:

"Azərbaycanda qarpızın təbii yetişmə dövrü ənənəvi olaraq iyunun ikinci yarısından sonra başlayır və hazırda bazarlarda satılan məhsulların hamısı süni üsullarla yetişdirilir.

Uzun illər praktik fəaliyyətim zamanı yay mövsümündə uşaqlarda müşahidə olunan mədə-bağırsaq pozğunluqlarının çox vaxt məhz qarpızla əlaqələndirildiyinin şahidi olmuşam. Qəbuluma gələn və ya telefonla müraciət edən valideynlərin əksəriyyəti uşaqlarında yaranan qarın ağrısı, ishal və digər həzm problemlərini qarpız yedikdən sonra müşahidə etdiklərini deyirlər. Yay aylarında mədə-bağırsaq pozğunluqlarının əsas səbəblərindən biri qida amilidir. Virus infeksiyaları da mövcuddur, amma ilk növbədə uşağın nə yediyi araşdırılır”, – deyə pediatr vurğulayıb.

Həkim bildirib ki, burada söhbət mütləq zəhərlənmədən getmir: 

"Mədə-bağırsaq sisteminin funksional pozğunluğu ilə qida zəhərlənməsi fərqli anlayışlardır. Zəhərlənmənin təsdiqlənməsi üçün konkret zəhərli maddənin aşkarlanması vacibdir. Lakin təbii yetişməmiş məhsullar uşaqların həssas həzm sisteminə mənfi təsir göstərə bilir.

Təkcə qarpız deyil. Bazarlarda gördüyümüz gilas, ərik, yemiş və digər məhsulların əksəriyyəti mövsümündən əvvəl satışa çıxarılan meyvələrdir. Bu meyvələr görünüş baxımından ideal təsir bağışlayır. Hamısı eyni ölçüdə, eyni formada olur. Halbuki təbiətdə məhsulların hər biri fərqli yetişir. Görünüş gözəl olsa da, dadı və qoxusu əvvəlki kimi hiss olunmur”, – deyə o qeyd edib.

Pediatr valideynlərə xüsusilə azyaşlı və körpə uşaqların qidalanmasına diqqətlə yanaşmağı tövsiyə edib. Onun sözlərinə görə, bəzi hallarda həzm pozğunluqları nəticəsində uşaqlar ciddi maye itkisi ilə üzləşir və bu zaman xəstəxana şəraitində maye dəstəyinə ehtiyac yaranır.

Qarayev hesab edir ki, mövsümündən əvvəl qarpız yemək üçün tələsməyə ehtiyac yoxdur:

“Bir neçə həftə gözləmək heç nəyi dəyişmir. Təbii yetişmiş məhsulu vaxtında yemək daha təhlükəsizdir. Sosial şəbəkələrdə kiminsə qarpız paylaşması valideynləri tələsdirməməlidir. Uşaqların sağlamlığı hər şeydən vacibdir”.

Həmçinin oxuyun

Nazirin yeni müşaviri kimdir? - Əmr verildi

Maşınlara etibarnamə verilməsi qüvvədən düşür?

Azərbaycanda məktəbə başlama vaxtı dəyişir? – Nazirin planı bəlli oldu

Oktyabrda neçə gün iş olmayacaq? - TƏQVİM