Bu halda təqaüdünüz dayandırılacaq 

Son vaxtlar bəzi vətəndaşlar qeydiyyatda olduqları yaşayış evləri söküldükdən sonra şəxsiyyət vəsiqələrinin sistemdə deaktiv göründüyünü, bunun da pensiya və digər sosial ödənişlərin alınmasında çətinlik yaratdığını bildirirlər.

Bəs qeydiyyat ünvanı ilə bağlı yaranan problem pensiya ödənişlərinin dayanmasına səbəb ola bilərmi?

Oxu24.com  bildirir ki, mövzu ilə bağlı konkret.az-a danışan iqtisadçı Razi Abbasbəyli bildirib ki, vətəndaşın heç bir ünvanda rəsmi qeydiyyatının olmaması pensiya ödənişlərinin müvəqqəti dayandırılmasına gətirib çıxara bilər.

“Vətəndaş daimi qeydiyyatda deyilsə, faktiki olaraq ona pensiya təminatı dayandırılır. Bir ünvandan digər ünvana qeydiyyat yerinin dəyişdirilməsi nəticə etibarilə pensiya ödənişlərinin dayanmasına səbəb ola bilir. Bu, qanunvericilikdə də öz əksini tapıb. Lakin bu, pensiyanın tamamilə ləğv edilməsi demək deyil. Sadəcə, vətəndaşın heç bir yerdə qeydiyyatı olmadığı müddətdə ödənişlərin icrası mümkün olmur”.

Ekspert qeyd edib ki, prosesdə əsas rol pensiya ödənişlərini həyata keçirən müvəkkil bankların üzərinə düşür. Banklar vətəndaşın qeydiyyat məlumatlarını sistem üzərindən yoxlayaraq ödənişləri həyata keçirirlər.

“Vətəndaşın müvafiq inzibati ərazi üzrə qeydiyyatı sistemdə görünürsə, pensiya ödənişi həyata keçirilir. Əgər qeydiyyat mövcud deyilsə, ödənişlər icra olunmur. Bu məsələdə Dövlət Sosial Müdafiə Fondunun və ya Əmək və Əhalinin Sosial Müdafiəsi Nazirliyinin xüsusi müdaxilə funksiyası yoxdur. Əsas məsələ vətəndaşın qeydiyyat məlumatlarının sistemdə aktiv olmasıdır”, – deyə o, vurğulayıb.

R.Abbasbəyli bildirib ki, vətəndaş yeni ünvanda qeydiyyata düşdükdən sonra məlumatlar sistemə daxil edilir və pensiya ödənişləri bərpa olunur. Lakin əlillik pensiyası və ya müddətli sosial təminat növləri üzrə yenidən təyinat tələb olunarsa, qeydiyyatın olmaması əlavə problemlər yarada bilər.

“Əgər vətəndaşın növbəti mərhələ üçün yenidən komissiyadan keçərək pensiya təyin etdirməsi tələb olunursa və həmin vaxt rəsmi qeydiyyatı yoxdursa, ona yeni təyinat verilməyə bilər. Buna görə də ilk növbədə faktiki yaşayış yeri üzrə qeydiyyat məsələsi həll olunmalıdır”, – ekspert qeyd edib.

İqtisadçının sözlərinə görə, qeydiyyat problemi nə dövlət qurumlarının, nə də bankların məsuliyyətidir:

“Bu, birbaşa vətəndaşın üzərinə düşən öhdəlikdir. Bir ünvandan çıxıb digər ünvana qeydiyyata düşənədək yaranan 10-15 günlük, bəzən isə bir aya qədər davam edən texniki müddətdə pensiya ödənişləri həyata keçirilməyəcək. Bu zaman yaranan gecikmələrin məsuliyyəti də vətəndaşın üzərində qalır”.

Ekspert əlavə edib ki, belə hallar təkcə evlərin sökülməsi zamanı deyil, mənzilin satılması, yaşayış yerinin dəyişdirilməsi və ya bir rayondan digərinə köçmə hallarında da baş verir. Onun sözlərinə görə, qanunvericilik vətəndaşın faktiki yaşayış yerinin müəyyən edilməsini tələb etdiyindən rəsmi qeydiyyatın vaxtında yenilənməsi sosial ödənişlərin fasiləsiz alınması baxımından mühüm əhəmiyyət daşıyır.

Həmçinin oxuyun

Döyüş meydanında yeni ERA: PUA-lar və Elektron Müharibə sistemləri müharibələrin taleyini necə dəyişir?  

Azərbaycanda bu sahədə  yeni mərhələ başlayır —Prezidentin təsdiqlədiyi Qanun nələri dəyişəcək?

Leysanla bağlı XƏBƏRDARLIQ

Pensiyalarla bağlı RƏSMİ AÇIQLAMA