Azərbaycan elminə ağır itki üz verib

Görkəmli alim və pedaqoq, fizika-riyaziyyat elmləri namizədi, dosent, Azərbaycan Respublikasının əməkdar müəllimi, Gəncə Dövlət Universitetinin fəxri professoru Nüyvər Loğman oğlu Nəsrullayev vəfat edib.

Oxu24.com xəbər verir ki, Gəncə Dövlət Universitetinin fəxri professoru uzun sürən xəstəlikdən sonra dünyasını dəyişib.

Nüyvər Nəsrullayev 1939-cu ilin martın 8-də Nuxa (indiki Şəki) rayonunun Oxud kəndində anadan olub.

O, 1958-ci ildə Nuxa rayonu Oxud kənd orta məktəbini qızıl medalla bitirib.

Nüyvər Nəsrullayev 1958–1962-ci illərdə o vaxtkı Kirovabad Dövlət Pedaqoji İnstitutunun (indiki Gəncə Dövlət Universitetinin) fizika-riyaziyyat fakultəsində təhsil alıb və institutu fərqlənmə diplomu ilə bitirib. O, 1969–1972-ci illərdə Bakı Dövlət Universitetinin aspiranturasında oxuyub, 1974-cü ildə Kazan Dövlət Universitetində professor Şirokovun rəhbərliyi ilə “Psevdoevklid fəzasının diferensial həndəsəsi haqqında” mövzusunda namizədlik dissertasiyasını müdafiə edib.

Onun elmi fəaliyyəti əsasən diferensial həndəsə və psevdoevklid fəzalarının tədqiqi ilə bağlı olub. Nüyvər Nəsrullayevin gərgin elmi-pedaqoji fəaliyyəti olub. O, ömrünü elmə, təhsilə və gənc nəslin yetişdirilməsinə həsr etmiş ziyalılardan olub.

Nüyvər Nəsrullayev 1962 – 1964-cü illərdə Nuxa rayonunun Cəyirli kənd məktəbində, 1964 – 1966–cı illərdə isə Nuxa şəhər 2 nömrəli orta məktəbində fizika və riyaziyyat müəllimi vəzifəsində çalışıb.

O, uzun illər ərzində Gəncə Dövlət Universitetində müəllim, dosent, kafedra müdiri, fakultə dekanı, prorektor kimi çalışıb.

Nüyvər Nəsrullayev 1977–1985-ci və 2000–2011-ci illərdə GDU-nun “Həndəsə və cəbr” kafedrasına rəhbərlik edib, 1985–1998-ci illərdə isə riyaziyyat-informatika fakultəsinin dekanı olub.

Nüyvər Nəsrullayev GDU-də ali həndəsə, analitik həndəsə və diferensial həndəsə fənlərini tədris edib.

O, “Həndəsənin əsasları”,“Qraflar”, “Həndəsə məsələləri”, “Qurmalar həndəsəsinin əsasları” kimi dəyərli dərs vəsaitlərinin müəllifidir.

2009-cu ildə Azərbaycan Respublikası Prezident İlham Əliyev tərəfindən ona Nüyvər Nəsrullayevə “Əməkdar müəllim” fəxri adı verilib, 2016-cı ildə isə o, GDU-nun “Fəxri professoru” adına layiq görülüb.

Allah rəhmət eləsin.

Həmçinin oxuyun

Prezidentdən Mikayıl Cabbarov ilə bağlı SƏRƏNCAM 

Saxlanıldığı deyilən Məhəmməd Balaqadaşovdan - Açıqlama 

Azərbaycan elminə ağır itki üz verib 

Prezident imzaladı:Bu qadağan edildi