Ev almaq sərfəlidir, yoxsa tikdirmək? – EKSPERT AÇIQLADI  

Azərbaycanın daşınmaz əmlak bazarında son aylarda müşahidə olunan passivlik və qiymət artımı həm alıcılar, həm də mütəxəssislər tərəfindən ciddi müzakirə olunur. Bazarın hazırkı vəziyyəti və vətəndaşlar üçün hansı seçimin daha sərfəli olması ilə bağlı əmlak eksperti Elnur Azadov maraqlı məqamlara toxunub.

Satış dinamikası niyə zəifdir?

Ekspertin  Oxu24.com-a verdiyi  məlumata  görə, ilin əvvəlindən bəri qiymətlərdə stabillik müşahidə olunsa da, alıcılıq qabiliyyəti ötən ilin eyni dövrü ilə müqayisədə bir qədər aşağı düşüb. Şəhərin mərkəz ətrafı ərazilərində (Bayır şəhər) dövlət hesabına genişmiqyaslı köçürülmə işlərinin aparılmasına və bazara böyük həcmdə dövlət vəsaitinin daxil olmasına baxmayaraq, gözlənilən canlanma baş verməyib:

"Dövlət investisiyası daxil olur, İpoteka proqramı artıq bir həftədir fəaliyyətdədir, lakin satış dinamikası hələ də zəifdir. İlin birinci rübünü bazar üçün ümumilikdə zəif qiymətləndirmək olar."

Qiymətlər şişirdilib: "30-40% bahalaşma reallığı əks etdirmir"

Elnur Azadov hesab edir ki, daşınmaz əmlak sektorunda mövcud qiymətlər real dəyərindən təxminən 30-40% yuxarıdır. Son dörd ildə baş verən kəskin bahalaşmanın iqtisadi əsaslarının olmadığını bildirən ekspert, bu vəziyyətin ümumi iqtisadiyyata zərər vurduğunu vurğulayıb. Onun fikrincə, vəsaitlərin yalnız daşınmaz əmlaka yönəlməsi digər sektorların inkişafını ləngidir.

Yeni ev tikmək, almaq?

Vətəndaşları ən çox düşündürən "hazır ev almaq, yoxsa yenisini tikdirmək?" sualına gəlincə, ekspertin rəyi birmənalıdır: Köhnə evi almaq hazırda daha sərfəlidir.

Bunun əsas səbəbləri kimi aşağıdakı faktorlar göstərilir:

* Maya dəyəri: 5-10 il əvvəl torpaq, inşaat materialları və işçilik indikindən 50-70% daha ucuz idi. Bu da həmin illərdə tikilən evlərin satış qiymətini daha münasib edir.

* Əlavə xərclər: Yeni ev tikərkən torpaq alışı, rəsmi icazələr, hasarın çəkilməsi və kommunikasiya xətlərinin çəkilməsi böyük maliyyə tələb edir.

* Qiymət fərqi: Hazırda bazarda köhnə evlərlə sıfırdan tikilən eyni alternativlər arasında orta hesabla 20-25% qiymət fərqi var”.

Nəticə: Yeni ev tikmək vətəndaşa öz zövqünə uyğun layihə reallaşdırmaq imkanı versə də, iqtisadi baxımdan hazır ev almaq ailə büdcəsi üçün daha qənaətcil hesab olunur.

Çimnaz Telmanqızı

Həmçinin oxuyun

Əhaliyə xəbərdarlıq!Sel,daşqın və qar gözlənilir

Bu qurumlarda işləyənlərin MAAŞLARI KƏSKİN ARTACAQ

Pensiyalarla bağlı rəsmi qərar: Yeni ildən qüvvəyə minəcək

Azərbaycanda sabahdan yeni qərar QÜVVƏYƏ MİNİR