Türk Mədəniyyəti və İrsi Fondunun prezidenti Azərbaycan KİV nümayəndələri ilə görüşüb  

Bakı şəhərində yerləşən Türk Mədəniyyəti və İrsi Fondunun mənzil-qərargahında təşkilatın prezidenti, professor Aktotı Raimkulovanın Azərbaycan kütləvi informasiya vasitələrinin nümayəndələri ilə görüşü keçirilib.

Görüş zamanı Fondun prezidenti, professor Aktotı Raimkulova media nümayəndələrinə təşkilatın fəaliyyət istiqamətləri, həyata keçirilən layihələr, əldə olunan nəticələr və qarşıdakı dövr üçün nəzərdə tutulan planlar barədə məlumat verib. O, Türk Mədəniyyəti və İrsi Fondunun fəaliyyətinin geniş auditoriyaya çatdırılmasında kütləvi informasiya vasitələrinin mühüm rolunu vurğulayaraq qeyd edib ki, Fond türk dünyasının zəngin mədəniyyəti və irsinin beynəlxalq müstəvidə təbliğinə töhfə verən əsas beynəlxalq qurumlardan biridir. Onun sözlərinə görə, 2024–2025-ci illər ərzində Fond tərəfindən 135-dən çox kompleks layihə, tədbir və təşəbbüs həyata keçirilib.

Görüş zamanı Fondun tərkibinin genişləndiyi də diqqətə çatdırılıb. Bildirilib ki, 2025-ci ildə Özbəkistan Fonda tamhüquqlu üzv kimi qoşulub, Türkmənistan isə müşahidəçi statusu əldə edib.

Görüş çərçivəsində maddi mədəni irsin qorunmasına yönəlmiş layihələr də təqdim olunub. Bu layihələrə Qırğızıstanda Alıkul Osmonovun ev-muzeyinin bərpası, Azərbaycanın Füzuli rayonunda yerləşən Qoçəhmədli məscidinin bərpası, eləcə də Qazaxıstanda qədim Kulan şəhərciyinin muzeyləşdirilməsi daxildir. Bununla yanaşı, iştirakçılara türk dünyasının mədəni irsinin təbliğinə yönəlmiş nəşr layihələri və rəqəmsal təşəbbüslər barədə də məlumat verilib.

Sonda Fondun prezidenti media nümayəndələrinə təşkilatın fəaliyyətinə göstərdikləri diqqətə və informasiya dəstəyinə görə təşəkkürünü bildirib, medianın türk xalqlarının ortaq mədəni irsinin təbliğində etibarlı tərəfdaş olduğunu vurğulayıb.

Tədbir Fondun prezidenti tərəfindən media nümayəndələrinin şərəfinə təşkil olunan iftar süfrəsi ilə davam edib.

Həmçinin oxuyun

SON DƏQİQƏ! Seyfəddin Rəhimov dünyasını dəyişib

Arzum bu halda azadlığa çıxa bilər - Vəkil açıqladı 

Vida mərasimində Azərbaycana mesaj: 139-cu ayə ilə nəyə eyham vuruldu? 

“Uzundərə" hədəfdədir: Erməni saxtakarlığı və elmi həqiqətlərin qarşıdurması — “Oxu24.com"un ARAŞDIRMASI