“Qarabağdan köçən ermənilər sərhəd bölgəsindən qaçırlar: Nə baş verir?”- Rey Kərimoğlu detalları açır  

2023-cü ilin sentyabrında antiterror əməliyyatından sonra Qarabağı könüllü tərk edən ermənilər Ermənistanın sərhəd bölgələrində məskunlaşdılar. 

Amma hansı səbəblərdənsə sərhəddə yaşamaq , Azərbaycan Ordusuna yaxın olmaq istəmədiklərini əsas gətirib sərhəd bölgələrini asta-asta tərk etməyə başladılar. 

Xüsusən, söhbət Qarabağı tərk edib gələnlərə qucaq açmış  Ermənistanın Tavuş bölgəsindən gedir. 

Ötən il erməni mediası  Tavuş rayonunda məskunlaşmış 2970 nəfər (780 ailə) erməninin  artıq 216 ailə və ya 1050 nəfər Tavuşu tərk etdiyini yazırdı. 

Bu gün yenidən  ermənilərin ən məşhur nəşri  “Hraparak” bu mövzunu işıqlandırıb.

Nəşr yazır ki, 16 dekabr 2025-ci ildə Tavuş qubernatoru Hayk Qalumyana hazırda bölgədə Qarabağdan köçən neçə ailə və fərdin yaşadığını və onlardan neçəsinin dövlət dəstəyi proqramı çərçivəsində Tavuş bələdiyyələrində mənzil aldığını öyrənmək üçün sorğu göndərdik:”Qubernatorluqdan bildiriblər ki, cari ilin 16 dekabr tarixinə olan məlumata görə, Qarabağdan köçən  1882 nəfər (550 ailə) Ermənistanın Tavuş bölgəsində yaşayır. Dövlət mənzil proqramı ilə bağlı səlahiyyətli orqan olan Ermənistan Respublikasının Əmək və Sosial Məsələlər Nazirliyi ilə əlaqə saxlamağı təklif edirik. Bu o deməkdir ki, son iki ildə Tavuş vilayətini 230 ailə (1088 nəfər) tərk edib".

Bu faktları oxuyan kimi adamın ağlına gələn ilk sual bu olur. Qarabağı tərk edən ermənilər   məskunlaşdıqları Ermənistan ərazisi olan sərhəd bölgəsini,  Tavuş vilayətini niyə qoyub qaçırlar?

Həmçinin oxuyun

Tanınmış siyasətçi: "Çinin və Rusiyanın İrana hərbi dəstəyi region üçün fəlakət ola bilər”   

Yeni rəis müavini təyin edildi - ÖZƏL

Kamran Əliyevdən yeni TƏYİNAT   - FOTO

“Qarabağdan köçən ermənilər sərhəd bölgəsindən qaçırlar: Nə baş verir?”- Rey Kərimoğlu detalları açır  

 Oxu24.com-un sualını Qarabağ qazisi, jurnalist Rey Kərimoğlu cavablandırıb.

O bildirib ki,  erməni mediasını arabir izləyirəm və tez-tez rast gəldiyim faktlardan biri Qarabağdan könüllü Ermənistana köç etmiş ermənilərin Ermənistanı  da tərk etməsidir:”Əvvəlqə qeyd edim ki, Ermənistanın sərhəd ərazisi olan Tavuş bölgəsinə kütləvi köçən Qarabağ erməniləri ümid edirdilər ki, “kürəklərini dayadıqları” hegemon qüvvələr  onları tezliklə Qarabağa qaytaracaq. Buna görə , ərazidən uzaqlaşmaq  istəmədilər. Sərhəd zonalarında məskunlaşdılar. 

Antiterror əməliyyatından sonra  Ermənistan  rəhbərliyinin də Qarabağın Azərbaycan ərazisi olduğunu etiraf etməsi köçkün ermənilərin geri dönüşə olan inamı azaltdı. Azərbaycan rəhbərliyinin onları geri çağırması, Azərbaycan vətəndaşı olaraq orada yaşamasına icazə verməsi  cavabsız qaldı. Çünki, onlar 1988-ci ildən başlayaraq işğal etdikəri torpaqlarımızda  azərbaycanlıların qanına əlləri batdığını anlayırdılar, geri dönməyə ürək etmədilər.  

İkinci bir tərəfdən: Qarabağda  sovet dönəmində yaşayan  ermənilərin, erməni mediasının şişirtdiyi kimi 150 min əhalisi olmayıb. İşğal zamanın dünyanın bir çox  ölkələrindən , o cümlədən Suriyadan, Livandan  ermənilərin Qarabağa kütləvi köçürülməsi tək bizə deyil bütün dünyaya məlum idi.  Buna baxmayaraq , 2016-cı il aprel döyüşlərindən sonra bir çox erməni ekspertlər Qarabağda yaşayan əhalinin sayının 60-65 min olduğunu yazırdı.

 Yəni, xaricdən Qarabağa erməni daşınsa da, özlərinin uydurduğu 150 min yalandan başqa bir şey deyildi. 

 Yadımdadır ki, hələ 2024-cü ildə oxumuşdum ki, Qarabağdan   Ermənistana köçən 17 743 nəfər hava və quru yolu ilə bu ölkədən də çıxıb gedib. Hazırda ermənilərin o əraziləri də tərk etməsinin əsas səbəbi isə odur ki, onlar  vaxtı ilə Qarabağa köçürülmə ermənilərdir və yerli  olmadıqları üçün iqtisadi çətinliklərlə  yaşamağı özlərinə rəva bilmirlər. Xüsusən, Qərb  ölkələrinə, Rusiyaya və ABŞ-a köçməyi üstün tutan  ermənilər Livandan , Suriyadan və başqa ölkələrdən gəlib Qarabağa yiyələnmək istəyən, bu alınmayanda isə ümidləri puç olan    ermənilərdir. Çünki əvvəldən onlara sahib çıxmayan  Ermənistanı tərk etməsi təbii bir prosesdir” -deyə Rey Kərimoğlu bildirib.

 Əntiqə Rəşid