Viza almaq asanlaşacaq – PREZİDENTDƏN SƏRƏNCAM

Azərbaycanda oktyabr ayında keçiriləcək «Formula -1» yarışı ilə əlaqədar olaraq ölkəyə gələn turistlər üçün viza prosedurları sadələşdiriləcək.

Dünən avqustun 10-da prezident İlham Əliyev Bakıda keçiriləcək «Formula 1» yarışı ilə əlaqədar ölkəyə gələn turistlər üçün üçün viza prosedurlarının sadələşdirilməsi haqqında Sərəncam imzalayıb.

Sərəncama əsasən, Bakıda keçiriləcək Formula 1 yarışı ilə əlaqədar Azərbaycana gələn turistlər 2024-cü il avqustun 15-dən sentyabrın 30-dək Azərbaycanın beynəlxalq hava limanlarında viza ala bilərlər.

Bunun üçün onlar ölkəyə gələrkən hava limanında müvafiq sənədləri təqdim etməlidirlər. Bunlar

1. Formula 1 yarışlarının beynəlxalq təşkilatçıları olan “Formula One Management Limited” Şirkətinin və Beynəlxalq Avtomobil Federasiyasının müvafiq qaydalarına uyğun olaraq akkreditasiyadan keçməni təsdiq edən akkreditasiya kartı və ya akkreditasiyadan keçməni təsdiq edən digər sənəd;

2. Bakı Şəhər Halqası Əməliyyat Şirkətində akkreditasiyadan keçməni təsdiq edən akkreditasiya kartı;

3. 2024-cü ildə Bakı şəhərində keçiriləcək Formula 1 yarışına bilet, o cümlədən elektron bilet və ya biletin əldə olunmasını təsdiq edən sənəddir.

Sərəncamda Azərbaycanın Xarici İşlər Nazirliyinə tapşırıq verilib ki, «Formula 1» yarışı ilə əlaqədar ölkəyə gələn turistlər üçün viza prosedurlarının sadələşdirilməsi barədə “Formula One Management Limited” Şirkətinə, Beynəlxalq Avtomobil Federasiyasına və xarici ölkələrin müvafiq orqanlarına məlumat versin. Eləcə də nazirlik yarışla əlaqədar ölkəmizə gələcək turistlər üçün viza prosedurlarının sadələşdirilməsi, turistlərin “ASAN Viza” sistemi vasitəsilə elektron viza almaq imkanı barədə məlumatı nazirliyin, eləcə də Azərbaycanın xarici ölkələrdəki səfirliklərinin və konsulluqlarının internet informasiya ehtiyatlarında yerləşdirilməsini təmin etməlidir.

Dövlət Miqrasiya Xidmətinə Azərbaycana uçuşlar həyata keçirən aviasiya şirkətlərinə Formula 1 yarışı ilə əlaqədar respublikamıza gələn əcnəbilər və vətəndaşlığı olmayan şəxslər üçün viza prosedurlarının sadələşdirilməsi barədə məlumat vermək tapşırılıb.