Ağciyərdə ləkə aşkarlanarsa nə etməli?- Cərrah AÇIQLADI   

Ağciyərdə rentgen və ya kompüter tomoqrafiyası (KT) zamanı aşkar edilən ləkə və ya törəmə bir çox insan üçün narahatlıq yaradır. Belə bir nəticə alan xəstələrin ilk sualı adətən eyni olur: “Bu xərçəngdirmi?” Torakal cərrah Fəyyaz Məmmədov  Oxu24.com-a bildirib ki, təkcə görüntüyə əsasən belə bir diaqnoz qoymaq mümkün deyil və hər bir xəstə mərhələli şəkildə qiymətləndirilməlidir.

Həkimin sözlərinə görə, ağciyərdə hər hansı kölgə, düyün və ya törəmə aşkar edildikdə ilk növbədə yüksək keyfiyyətli kompüter tomoqrafiyası aparılmalıdır. Məhz KT müayinəsi törəmənin ölçüsünü, formasını, yerləşdiyi sahəni, sərhədlərini və digər xüsusiyyətlərini daha dəqiq göstərir. Bu məlumatlar sonrakı müayinə və müalicə planının hazırlanması üçün əsas rol oynayır.

Fəyyaz Məmmədov qeyd edir ki, xəstələr çox vaxt KT cavabı ilə həkim qəbuluna gələrək “Bu xoşxassəlidirmi, yoxsa bədxassəlidir?” sualını verirlər. Lakin yalnız görüntüyə əsaslanaraq qəti qərar vermək mümkün deyil. Həkimlər törəmənin yerləşdiyi nahiyəyə, ölçüsünə, formasına, sərhədlərinə və digər radioloji əlamətlərə baxaraq müəyyən ehtimallar irəli sürə bilərlər. Ancaq bu, hələ yekun diaqnoz demək deyil.

Mütəxəssis vurğulayır ki, xüsusilə 45–50 yaşdan yuxarı kişilərdə, uzun illər siqaret çəkən şəxslərdə ağciyərdə aşkarlanan törəmələrin bədxassəli olma ehtimalı daha yüksək qiymətləndirilir. Bununla belə, hər ləkə və ya düyün xərçəng mənasını vermir. Ağciyərdə infeksiyalar, köhnə iltihab ocaqları, vərəm izləri, xoşxassəli şişlər və digər səbəblər də oxşar görüntü yarada bilər. Buna görə də tələsik nəticə çıxarmaq düzgün deyil.

Həkimin sözlərinə görə, bu mərhələdə ən vacib addımlardan biri biopsiyanın aparılmasıdır. Biopsiya zamanı törəmədən kiçik toxuma nümunəsi götürülərək laboratoriyada mikroskop altında araşdırılır. Məhz bu analiz törəmənin xoşxassəli, yoxsa bədxassəli olduğunu dəqiq müəyyən etməyə imkan verir.

Fəyyaz Məmmədov cəmiyyətdə geniş yayılmış bir yanlış fikrə də toxunur. Onun sözlərinə görə, bəzi insanlar “biopsiya etdirmək şişi oyadır”, “xərçəngi yayır” kimi əsassız iddialara inanırlar. Halbuki bu fikir elmi baxımdan təsdiqlənməyib. Müasir tibbdə biopsiya bütün dünyada qəbul edilmiş standart diaqnostik üsuldur və xərçəng diaqnozunun təsdiqlənməsi üçün ən etibarlı yoldur.

Torakal cərrah bildirir ki, həkimlər heç bir qərarı şəxsi mülahizələrə əsasən vermirlər. Ağciyər xərçəngi də daxil olmaqla bütün onkoloji xəstəliklərin diaqnostika və müalicəsi beynəlxalq tibbi protokollar əsasında həyata keçirilir. Bu protokollar xəstənin hansı mərhələdə hansı müayinədən keçməli olduğunu dəqiq müəyyənləşdirir.

Mütəxəssis əlavə edir ki, diaqnoz dəqiqləşdirilmədən müalicəyə başlamaq düzgün yanaşma deyil. Çünki hər törəmənin müalicə üsulu fərqlidir. Bəzi hallarda cərrahi əməliyyat tələb olunur, bəzi hallarda isə kimyaterapiya, şüa terapiyası və ya hədəfli müalicələr daha uyğun hesab edilir. Hansı yolun seçilməsi yalnız biopsiya nəticəsi və xəstəliyin mərhələsi müəyyənləşdirildikdən sonra mümkündür.

Fəyyaz Məmmədov sonda vətəndaşlara çağırış edərək bildirir ki, KT müayinəsində ağciyərdə ləkə və ya törəmə aşkarlanarsa, panikaya düşmək olmaz, eyni zamanda bunu diqqətdən kənarda saxlamaq da təhlükəlidir. Vaxtında torakal cərrah və ya onkoloqa müraciət etmək, lazım olan müayinələri tamamlamaq və biopsiyadan çəkinməmək erkən diaqnoz və uğurlu müalicə üçün ən vacib şərtlərdən biridir. Erkən mərhələdə aşkarlanan ağciyər xərçəngi hallarında müalicənin effektivliyi və sağqalma göstəriciləri xeyli yüksək olur. Buna görə də ağciyərdə aşkar edilən hər bir şübhəli törəmə peşəkar şəkildə qiymətləndirilməli və həkim tövsiyələrinə uyğun olaraq mərhələli diaqnostika aparılmalıdır.

Həmçinin oxuyun

Sosial büdcədə rekord: maaş və pensiyalar artır? 

Prezidentin vəzifədən azad etdiyi məmurla bağlı yeni qərar verildi

SON DƏQİQƏ AÇIQLAMASI: Avqustun 10-dan sonra başlanılacaq

Yüksək vəzifəyə təyinat alan xanım KİMDİR? — FOTO