Nadir Azəri: Azərbaycanın müstəqil siyasəti Tehranın narahatlığına səbəb olur  

44 günlük Vətən müharibəsində tarixi Zəfər qazanan Azərbaycan regionda yeni reallıqlar yaradıb. Bu gün Cənubi Qafqazın davamlı sabitliyi və inkişafı məhz həmin reallıqların qəbulundan və yeni əməkdaşlıq imkanlarından keçir. Lakin təəssüf ki, Azərbaycanın əldə etdiyi uğurlar, artan beynəlxalq nüfuzu və davamlı inkişafı bəzi xarici gücləri, xüsusilə də cənub qonşumuz İranı ciddi narahat edir. Bu narahatlığın müxtəlif təxribatlar və Azərbaycana qarşı yönəlmiş addımlarla müşayiət olunduğunu müşahidə edirik.

Bunu “Orta Asiya və Güney Qafqaz Söz Azadlığı Şəbəkəsi” (CASCFEN) İctimai Birliyinin sədri, siyasi şərhçi Nadir Azəri Oxu24.com-a açıqlmasında  deyib.

Onun sözlərinə görə, İran Azərbaycanın torpaqlarının təxminən 30 il davam edən işğal dövründə ərazi bütövlüyünün bərpasına real dəstək göstərmək əvəzinə, bir sıra hallarda Ermənistanla əməkdaşlıq edib və işğalçı tərəflə münasibətlərini davam etdirib. Bu gün isə Azərbaycanın müstəqil siyasəti, iqtisadi gücü, regional liderliyi və Türk dünyası ilə əlaqələrinin genişlənməsi Tehranı narahat edən amillər sırasındadır.

Nadir Azəri qeyd edib ki, son günlər Bakıdakı bəzi təhsil müəssisələri ilə bağlı baş verən hadisələrə də ciddi yanaşmaq lazımdır. Məktəblərə hücum və dağıntı törətmək cəhdləri ilə bağlı faktlar hərtərəfli araşdırılmalı, hadisələrin təşkilatçıları və mümkün sifarişçiləri müəyyən edilməlidir. Heç şübhəsiz bu zaman “xoruzun quyruğu” görünəcək. Əslində, guya hicab davası edən radikal ünsürlərun həmin gün məktəblərdə farsca mərsiyələr səsləndirməsi həmin “quyruğu” göstərmiş oldu.

Siyasi şərhçinin fikrincə, Azərbaycanın əsas hədəfi regionda sülhü, təhlükəsizliyi və əməkdaşlığı möhkəmləndirməkdir. Bununla yanaşı, ölkəmizin suverenliyinə, ictimai sabitliyinə və təhsil müəssisələrinin təhlükəsizliyinə yönələn istənilən cəhdin qarşısı hüquqi müstəvidə qətiyyətlə alınmalıdır. Azərbaycan cəmiyyəti isə belə həssas məsələlərdə təmkinli davranmalı, təsdiqlənməmiş məlumatların yayılmasına yol verməməlidir.

Turan Etibaroğlu

Həmçinin oxuyun

Kombi istifadə edənlərin NƏZƏRİNƏ 

Türkiyə Prezidentinin Şuşada rəsmi qarşılanma mərasimi keçirilir - CANLI 

Ərdoğanın Azərbaycan səfərinin YENİ DETALLARI

Polkovnik-leytenant: Müharibə dövründə Prezidentin Xalqa müraciətlərini ayrıca qiymətləndirmək lazımdır