2026-cı ilin ilk 7 ayında Ermənistana 17,3 milyon dollarlıq ixrac: Azərbaycan üçün nə dəyişir?   

2026-cı ilin ilk 7 ayında Azərbaycanın Ermənistana 17 milyon 372,1 min dollar dəyərində məhsul ixrac etməsi iki ölkə arasında iqtisadi münasibətlərin bərpası baxımından mühüm göstəricidir. Dövriyyənin həcmindən asılı olmayaraq, ticarət əlaqələrinin başlaması Cənubi Qafqazda sülh, sabitlik və siyasi dialoqun dərinləşməsinə xidmət edir. Hazırda Azərbaycan əsasən neft-benzin məhsulları və kosmik xidmətlər üzrə ixracı həyata keçirsə də, iqtisadi strukturların fərqliliyi gələcəkdə ticarət portfelinin şaxələnməsinə imkan yaradır. Əlaqələrin genişlənməsi həm regional təhlükəsizlik, həm də hər iki ölkənin uzunmüddətli iqtisadi maraqları üçün strateji əhəmiyyət kəsb edir.

Mövzu ilə bağlı Oxu24.com-a açıqlama verən iqtisadçı ekspert Rəşad Həsənov bildirib ki, Azərbaycan və Ermənistan arasında ticarət dövriyyəsinin həmçinin iqtisadi münasibətlərin bərpası özlüyündə müsbətə doğru atılmış vacib addımdır. 

O qeyd edib ki, region ölkələrinin inkişafı, sosial-iqtisadi və siyasi münasibətlərin dərinləşməsi bütövlükdə Cənubi Qafqazın təhlükəsizliyi baxımından böyük əhəmiyyət daşıyır.

İqtisadçının sözlərinə görə, hazırda Azərbaycan bir tərəfli qaydada karbohidrogen resurslarının, xüsusilə neft və benzin məhsullarının ixracını təşkil etməklə münasibətlərin startını verib. Eyni zamanda kosmik xidmətlər üzrə də müəyyən sövdələşmələr mövcuddur:

“İndiki mərhələdə 17 milyon dollarlıq göstərici Azərbaycan üçün böyük iqtisadi faktor sayılmasa da, siyasi aspektdən çox mühümdür. Çünki bu, tərəflər arasında münasibətlərin pozitiyə doğru inkişafının göstəricisidir”.

Rəşad Həsənov vurğulayıb ki, gələcəkdə ticarət dövriyyəsinin genişlənməsi üçün kifayət qədər potensial var. Azərbaycan yalnız təbii qaz və ya neft məhsulları deyil, kimya sənayesi (gübrələr, polimer, plastik kütlələr) və tikinti materialları da ixrac edə bilər. Ermənistan tərəfi isə dəlvar metallar, yüngül sənaye, geyim, kənd təsərrüfatı və içki məhsulları ilə Azərbaycan bazarında pay əldə edə bilər. Orta müddətli dövrdə Ermənistanın süni intellekt, texnoloji həllər və İT xidmətləri sahəsində də müəyyən üstünlüklər təqdim etməsi mümkündür.

“Hər iki ölkənin uzunmüddətli iqtisadi ənənələri və fərqli iqtisadi strukturları xarici ticarət imkanlarını artırır. Düşünürəm ki, bu istiqamətdəki təşəbbüslər sürətlə dərinləşdirilməli və genişləndirilməlidir”,- deyə iqtisadçı əlavə edib. 

Çimnaz Telmanqızı

Həmçinin oxuyun

TƏCİLİ! Avtomobil aşaraq yanıb, ölən və xəsarət alan var

Coşqun və Ucalın ölümünün şok detalları:200-300 metr aralı olublar -VİDEO

Bu şəxslərə əmək pensiyası xüsusi qaydada təyin olunur – AÇIQLAMA 

Qadınların 55 yaşında pensiyaya çıxması ilə bağlı AÇIQLAMA