Ədalətə açılan qapı: ALİ MƏHKƏMƏ   

Azərbaycan Respublikasının Ali Məhkəməsi ölkənin məhkəmə-hüquq sisteminin ali instansiyası olaraq, vətəndaşların hüquq və azadlıqlarının müdafiəsində ən yüksək mərhələni təşkil edir. Məhkəmə Konstitusiyaya əsaslanaraq, aşağı instansiya məhkəmələrinin qəbul etdiyi qərarların qanuniliyini və ədalətliliyini yoxlayır, hüquqi praktikanın vahid şəkildə tətbiqini təmin edir.

Oxu24.com xəbər verir ki,Ali Məhkəmə mülki, cinayət, inzibati və iqtisadi kollegiyalardan ibarətdir. Hər bir kollegiya öz sahəsi üzrə daxil olan şikayət və kassasiya müraciətlərini araşdıraraq, hüquqi məsələlərə son nöqtəni qoyur. 

Belə ki, Mülki Kollegiya-Ailə, əmlak, müqavilə mübahisələri, əmək münasibətləri kimi mülki hüquqa aid işlər üzrə daxil olan kassasiya şikayətlərinə baxır.

Cinayət Kollegiyası-Cinayət işləri üzrə aşağı instansiya məhkəmələrinin çıxardığı hökm və qərarlardan verilən şikayətləri araşdırır.

İnzibati Kollegiya-Dövlət qurumlarının qərar və hərəkətlərindən narazılıqla bağlı vətəndaşların şikayətlərini, yəni inzibati işləri araşdırır.

İqtisadi Kollegiya-Vergi, sahibkarlıq fəaliyyəti, təsərrüfat mübahisələri və kommersiya xarakterli işlərlə bağlı kassasiya şikayətlərinə baxır.

Eyni zamanda Ali Məhkəmə məhkəmə-hüquq sistemində vahid məhkəmə təcrübəsinin formalaşmasına nəzarət edir və lazım olduqda plenum qərarları ilə hüquqi boşluqlara aydınlıq gətirir.

Qurumun fəaliyyəti ədalət mühakiməsinin şəffaflığının artırılması, proseslərin rəqəmsallaşdırılması və vətəndaşların məhkəmələrə çıxış imkanlarının genişləndirilməsi istiqamətində də mühüm addımlarla müşayiət olunur. Onlayn müraciət, elektron sənəd dövriyyəsi və açıq məhkəmə məlumatlarının paylaşılması bu islahatların əsas hissəsidir.

Ali Məhkəmə öz missiyasını bir cümlə ilə ifadə edir: qanunun aliliyinin qorunması və hüququn hamı üçün bərabər tətbiqi. Bu instansiya cəmiyyətin ədalətə olan inamını möhkəmləndirən ən vacib dövlət qurumlarından biridir.

Həmçinin oxuyun

Anar Əliyevdən YENİ TƏYİNAT

Makron Zelenskiyə nə deyib?

BDU-nun tələbəsi necə səfir oldu?  - MARAQLI FAKTLAR 

Ramiz - Əli işbirliyinin yeni DETALLARI

Onu da qeyd edək ki, Ali Məhkəmə binası 5 mərtəbədən ibarətdir. 9 zal mövcuddur və yalnız 2 zal istifadə olunur.  Konfrans zalı, plenumun iclas zalı, muzey və digər yerlər var. Rəsmi tədbirlərdə,  xarici qonaqlar gəldikdə, təqaüdə çıxan hakimlər üçün tədbirlər keçirildikdə konfrans zalından istifadə olunur. 

Muzeydə digər ölkələrin Ali Məhkəmələrinə, Prokurorluqlarına aid kiçik nümunələr, Məhkəmə Hakiminin xüsusi geyiminin nümunəsi və s. mövcuddur. 

Çimnaz Ağayeva