Prezident tərəfidən təltifini ilk dəfə bizdən eşitdi - AÇIQLAMA

CƏMİYYƏT

149

26.05.2026, 17:07

Prezident İlham Əliyev tərəfindən mədəniyyət sahəsi üzrə Dövlət Mükafatına layiq görülən tanınmış xalçaçı-rəssam Eldar Mikayılzadə sevincini Oxu24.com saytı ilə bölüşüb.

O, “Azərbaycan xalçası – ilmələrin rəqsi”, “Xəmsə” silsilələri və “Səmavi dinlər” triptixinə görə Dövlət Mükafatına layiq görülüb.

Sənətkar bildirib ki, bu xəbər onun üçün həm böyük qürur, həm də uzun illərin zəhmətinə verilən yüksək dəyərin göstəricisidir:

“Bu şad xəbəri ilk dəfə sizdən eşitdim. Çox həyəcanlı və qürurluyam. Bu il mənim 70 yaşım tamam olur. Bir insanın ömrünü sənətə, milli mədəniyyətə və dövlətçiliyə xidmətə həsr etməsi, illərlə çəkdiyi zəhmətin dövlət tərəfindən qiymətləndirilməsi böyük xoşbəxtlikdir. Bu, sənətkar üçün ən ali mükafatlardan biridir.

Mən illər boyu Azərbaycan xalça sənətinin yaşadılması, inkişaf etdirilməsi və dünyaya tanıdılması üçün çalışmışam. Xalça bizim milli kimliyimiz, tariximiz və mənəviyyatımızdır. Hər bir ilmədə xalqımızın ruhu, keçmişi və yaddaşı yaşayır. Bu sənətə sevgim uşaqlıqdan başlayıb və ömrümün ən böyük hissəsi bu yaradıcılığa həsr olunub.

Dövlətin sənətkara diqqəti və qayğısı yaradıcı insanı daha da ruhlandırır. Əməyinin qiymətləndirildiyini görmək insana yeni güc verir, onu daha böyük işlər görməyə həvəsləndirir. Mən bunu yalnız özümə verilən mükafat kimi deyil, ümumilikdə Azərbaycan xalça sənətinə verilən yüksək qiymət hesab edirəm.

Bu etimad və diqqət mənim üçün həm böyük sevinc, həm də böyük məsuliyyətdir. Bundan sonra da Azərbaycan mədəniyyətinin inkişafı və milli sənətimizin təbliği üçün çalışmağa davam edəcəyəm.”