22 ildir vəzifədə olan xanım prorektor kimdir? — DOSYE

Jalə Əhməd qızı Qəribova Azərbaycan ali təhsil sistemində beynəlxalq əlaqələrin inkişafına mühüm töhfələr vermiş tanınmış alim və pedaqoqdur. O, hazırda Azərbaycan Dillər Universitetinin Beynəlxalq Əlaqələr üzrə prorektoru vəzifəsində fəaliyyət göstərir.

Oxu24.com xəbər verir ki,1963-cü ildə Bakı şəhərində anadan olan Jalə Qəribova ilk təhsilini paytaxtdakı 190 saylı orta məktəbdə alıb. Daha sonra Bakı Musiqi Kollecində pianino müəllimliyi ixtisasını bitirib. 1982-1987-ci illərdə Azərbaycan Dillər Universitetində Xarici dil müəllimliyi (ingilis dili) üzrə ali təhsil alıb.

Elmi fəaliyyətini davam etdirən Jalə Qəribova 1990-1993-cü illərdə Azərbaycan Milli Elmlər Akademiyasının Linqvistika İnstitutunda “Türk dillərində kəmiyyət kateqoriyasının inkişafı” mövzusunda dissertasiya müdafiə edərək dilçilik üzrə fəlsəfə doktoru elmi dərəcəsinə yiyələnib.

Əmək fəaliyyətinə müəllim kimi başlayan Jalə Qəribova müxtəlif ali təhsil müəssisələrində məsul vəzifələrdə çalışıb. O, Qərb Universitetində Xarici Dillər kafedrasının müdiri və daha sonra Elmi İşlər üzrə prorektor kimi fəaliyyət göstərərək beynəlxalq layihələrin həyata keçirilməsinə rəhbərlik edib.

2004-cü ildən etibarən Azərbaycan Dillər Universitetinin Beynəlxalq Əlaqələr üzrə prorektoru olan Jalə Qəribova ali təhsilin beynəlxalq standartlara uyğunlaşdırılması istiqamətində bir sıra mühüm layihələrin müəllifidir. Onun təşəbbüsü ilə Azərbaycan universitetləri arasında ilk dəfə Avropa Birliyinin TEMPUS proqramı çərçivəsində qrant layihələri qazanılıb.

Jalə Qəribovanın fəaliyyəti dövründə Azərbaycan Dillər Universiteti xarici ali təhsil müəssisələri ilə uğurlu əməkdaşlıq əlaqələri qurub. Xüsusilə, Esseks Universiteti ilə birgə Azərbaycanda ilk ikili diplom layihəsi və Strasburq Universiteti ilə birgə ilk delokalizasiya layihəsi həyata keçirilib.

O, həmçinin Avropa Birliyi, Britaniya Şurası, Alman Akademik Mübadilə Təşkilatı (DAAD), Amerika Təhsil Şurası və TİKA kimi beynəlxalq qurumlarla sıx əməkdaşlıq çərçivəsində müxtəlif təhsil proqramlarının reallaşdırılmasına töhfə verib.

Sosiolinqvistika sahəsində də elmi fəaliyyətini davam etdirən Jalə Qəribova yerli və beynəlxalq akademik nəşrlərdə çap olunmuş 60-dan çox elmi məqalənin, 2 kitabın müəllifi və 3 kitabın həmmüəllifidir.

Onun uzunillik fəaliyyəti Azərbaycan ali təhsilinin beynəlxalq aləmdə tanınmasına və modernləşdirilməsinə mühüm töhfə kimi qiymətləndirilir.

Hazırladı: Vüsal Qarabağlı 

Həmçinin oxuyun

Onların maaşı 14 % artıb

İyunda pensiya gözləyənlərə ŞAD XƏBƏR

Keçid balları qalxacaq, yoxsa enəcək? – Mühüm AÇIQLAMA  

SON DƏQİQƏ! AZAL uçuşları ləğv etdi