Azərbaycanda cərimələrin məbləği gəlirlərə görə dəyişə bilər – YENİ TƏKLİF  

Oxu24.com xəbər verir ki, Azərbaycanda  inzibati xətalara görə tətbiq edilən cərimələrin məbləğinin minimum əməkhaqqı göstəricilərinə uyğunlaşdırılması və sosial ədalət prinsipinin qorunması məsələsi gündəmə gətirilib. Ekspertlər hesab edirlər ki, mövcud sistem aşağı gəlirli vətəndaşlar üçün ağır yük olduğu halda, yüksək gəlirli şəxslər üçün profilaktik əhəmiyyətini itirir.

Differensial yanaşma: “Cərimə hər kəsin cibinə görə olmalıdır”.

İqtisadçı Ruslan Atakişiyev mövzu ilə bağlı Oxu24.com-a verdiyi açıqlamada bildirib ki, cərimələrin müəyyənləşdirilməsində ən effektiv metodlardan biri differensial yanaşmadır. Bu yanaşma, cərimə məbləğlərinin əhalinin gəlir səviyyəsinə nisbətdə tətbiq edilməsini nəzərdə tutur.

Ekspertin fikrincə, vahid cərimə sistemi cəmiyyətin müxtəlif təbəqələrinə eyni dərəcədə təsir göstərmir:

"Cərimələr yüksəldiyi zaman bu, daha çox aşağı gəlirli insanlar üçün ödənilməsi çətin bir öhdəliyə çevrilir. Lakin yüksək gəliri olan şəxslər üçün həmin məbləğlər cüzi xarakter daşıdığına görə, onları məsuliyyətə cəlb etmək və qanun pozuntusundan çəkindirmək funksiyasını tam yerinə yetirmir. Bu baxımdan differensial yanaşma daha ədalətli və effektiv olardı”.

Təklifə əsasən, cərimə məbləğlərinin sabit rəqəmlərlə deyil, minimum əməkhaqqının müəyyən misilləri ilə hesablanması və ya şəxsin rəsmi gəlirlərinə faiz nisbəti ilə bağlanması müzakirə mövzusudur. Bu, həm büdcə daxilolmalarının tənzimlənməsi, həm də hüquqpozmaların qarşısının alınmasında hər bir vətəndaş üçün real çəkindirici amil yarada bilər.

Həmçinin oxuyun

SON DƏQİQƏ! TƏBİB-ə  rəhbər təyin olundu

Orban getdi, Peter Madyar gəldi: Macarıstanda yeni hakimiyyət Azərbaycanın maraqlarına necə təsir edəcək?  —  TƏHLİL

Nazirlər Kabinetindən yeni QƏRAR:  Sentyabrın 1-dən qüvvəyə minir

Nazirlər Kabineti ÖDƏNİŞLƏRLƏ bağlı QƏRAR VERİB 

Qeyd edək ki, beynəlxalq təcrübədə, xüsusilə bir sıra Avropa ölkələrində (məsələn, Finlandiya və İsveç) yol hərəkəti və digər inzibati qayda pozuntularına görə cərimələr şəxsin illik gəlirinə əsasən hesablanır ki, bu da "varlı və kasıb" arasında hüquqi bərabərliyi təmin edir.

Cəmiyyətdə böyük maraq doğuran bu təklifin qanunvericilik səviyyəsində dəyərləndirilib-dəyərləndirilməyəcəyi isə növbəti mərhələlərdə bəlli olacaq.

Çimnaz Telmanqızı