Qulağı ayağa tikdilər - Unikal ƏMƏLİYYAT

TİBB

814

31.12.2025, 10:38

Xəbərlərimizi Google-da izləyin

Yeniliklərdən dərhal xəbərdar olun

Çinin Şandun əyalət xəstəxanasında çalışan mikrocərrahi komanda, Dr. Qiu Shenqiang rəhbərliyində tibb tarixinə düşən unikal bir əməliyyata imza atıb.

"South China Morning Post" nəşrinin yazdığına görə, aprel ayında ağır iş qəzası nəticəsində xəstə Sunun baş dərisi, boynu və üz nahiyəsi ciddi şəkildə zədələnib, dəri çoxsaylı fraqmentlərə parçalanıb, qulaq isə baş dərisi ilə birlikdə tamamilə qopub.

Məlumata görə, cərrahlar ilkin mərhələdə baş dərisini ənənəvi rekonstruktiv üsullarla bərpa etməyə çalışıblar. Lakin qəza zamanı baş dərisinin toxumaları və qan damarları o qədər ağır zədələnib ki, bu metodlar effekt verməyib. Ağır toxuma zədələnməsi səbəbindən qulağın dərhal yerinə tikilməsi mümkün olmadığından, həkimlər radikal bir qərar verdilər:

Qopan qulaq canlılığını qorumaq üçün müvəqqəti olaraq xəstənin ayaq pəncəsinə tikildi. Ayaq nahiyəsində qan dövranının nisbətən yaxşı olması qulağın toxumalarının canlı saxlanmasına imkan verib. Bu mərhələdə əsas məqsəd qulaq toxumasını nekrozdаn qorumaq və qan axınını tədricən bərpa etmək olub.

Təxminən 10 saat davam edən ilk əməliyyat zamanı qalınlığı cəmi 0,2 millimetr olan damarlar uğurla birləşdirildi.

Əməliyyatdan sonra qulaqda damar tutulması yarananda, komanda onu xilas etmək üçün 5 gün ərzində təxminən 500 dəfə manuel (əllə) qan boşaltma proseduru həyata keçirdi.

5 ay müddətində davam edən müayinə və müalicələrdən sonra, yəni oktyabr ayında qulaq uğurla yenidən öz yerinə köçürüldü.

Həkimlər bildiriblər ki, qan dövranı tam bərpa olunub və qulaq demək olar ki, normal görünüşünə qayıdıb.