Toyların ən bahalı simaları: kim nə qədər alır?

ŞOU-BİZNES

888

03.01.2026, 19:22

Xəbərlərimizi Google-da izləyin

Yeniliklərdən dərhal xəbərdar olun

Azərbaycanda toy mərasimləri artıq təkcə ailəvi sevinc deyil, eyni zamanda böyük büdcə tələb edir. Xüsusilə tanınmış müğənni və aparıcıların toy qiymətləri son günlər cəmiyyətdə geniş müzakirələrə səbəb olur.

Oxu24.com-un məlumatına görə, Xalq artisti Aygün Kazımovanı toyunda cəmi yarım saatlıq görünmək istəyən şəxslər üçün minimum qiymət 10 min manatdır.

Bu qiymətə toya qatılan növbəti ifaçının Xalq artisti Röya Ayxan olduğu bildirilir.

Qeyd olunur ki, Röya Ayxan toyda qısa müddətli çıxış etsə də, adı və populyarlığı toy sahibləri üçün əsas seçim səbəblərindən biri olur.

Toy bazarında ən çox diqqət çəkən məqam isə aparıcıların qiymətlərinin bəzən müğənniləri belə geridə qoymasıdır. Belə ki, tanınmış aparıcı cütlük Zaur və Günay Baxşəliyevlər bir toy mərasimi üçün 25 min manat, televiziya aparıcısı Vüsalə Əlizadə isə 18 min manat tələb edir.

Mütəxəssislər bildirir ki, aparıcıların yüksək məbləğ istəməsinin əsas səbəbi onların toy mərasimini bütövlükdə idarə etməsi ilə bağlıdır. Aparıcılar yalnız səhnəyə çıxmaqla kifayətlənmir, toyun axarını qurur, qonaqların əyləncəsini təmin edir, proqramı koordinasiya edir və toyun problemsiz keçməsinə nəzarət edirlər. Bu isə onların məsuliyyətini və rolunu artırır.

Toy sahibləri isə seçim zamanı həm büdcəni, həm də toyun səviyyəsini nəzərə aldıqlarını bildirirlər. Bəziləri üçün məşhur bir ad toyun prestijini artırırsa, digərləri üçün aparıcının peşəkarlığı mərasimin uğurla keçməsində həlledici rol oynayır.

Qeyd edək ki, son illər toy qiymətlərinin artması, müğənni və aparıcı qonorarlarının yüksəlməsi sosial şəbəkələrdə də geniş müzakirə olunur və bu mövzu cəmiyyətin diqqət mərkəzində qalmaqda davam edir.

Nigarxanım

Həmçinin oxuyun