Ermənistanda müharibə xofu: Silahlar işə düşəcək?

Son həftələrdə Ermənistanda siyasi ritorika, xüsusilə müharibə mövzusu nəzərəçarpacaq dərəcədə güclənib. Baş nazir Nikol Paşinyan bəyan edib ki, əgər Rusiyapərəst müxalifət hakimiyyətə gəlsə, Azərbaycanla yeni müharibə qaçılmaz olacaq. Paşinyan hətta bunu ehtimal deyil, “real təhlükə” adlandırıb.

Oxu24.com xəbər verir ki Eyni zamanda, Paşinyanın əleyhdarları iddia edirlər ki, Paşinyan hakimiyyətdə qalsa, Rusiya ilə münasibətlər gərginləşə bilər. “Güclü Ermənistan” partiyasının lideri Samvel Karapetyan Ermənistan rəhbərliyinin Rusiya ilə münasibətləri düşmənçilik həddinə çatdırmaqda günahlandırıb. O, Rusiyanın “səbr kasası”nın dolduğunu xatırladıb. “Paşinyan hakimiyyətdən getməsə, Rusiya Ermənistan iqtisadiyyatını çökdürəcək”, - Karapetyan deyib.

Bir sözlə, hər iki tərəf cəmiyyəti mümkün müharibə təhlükəsi ilə qorxudaraq siyasi mövqelərini möhkəmləndirməyə çalışır.

Analitiklər hesab edir ki, bu ritorikanın güclənməsinin arxasında yaxınlaşan seçkilər dayanır. İki ay sonra Ermənistanda parlament seçkiləri keçiriləcək və hakimiyyət, eləcə də müxalifət, seçici bazasını konsolidə etmək və narazı kütlələri öz tərəflərinə çəkmək üçün müharibə xofundan istifadə edir. Siyasi şərhçilər vurğulayır ki, bu taktika cəmiyyətdə qlobal təhlükə imici yaradaraq seçicilərin təhlükəsizlik məsələsində daha emosional qərarlar verməsinə təsir edə bilər.

Bəs müharibə təhlükəsi nə dərəcədə realdır? Ekspertlər bildirirlər ki, hazırda açıq hərbi əməliyyat ehtimalı aşağıdır, çünki tərəflər həm daxili, həm də beynəlxalq təzyiqləri nəzərə alırlar. Əsas təhlükə seçkilərdən sonra siyasi qeyri-müəyyənlik və radikal qərarların qəbul edilməsi ilə bağlıdır. Hələlik isə görünən odur ki, müharibə ritorikası təkcə qorxutmaq məqsədi daşımır, həm də seçki strategiyası və regional siyasətdə manevr vasitəsi kimi də istifadə olunur.

Həmçinin oxuyun

 SOCAR prezidentinin müşavirinə yüksək vəzifə verildi - Sabiq nazir rəhbər təyin olundu 

TƏCİLİ! AZAL bu istiqamətdə uçuşları ləğv etdi

Bu tarixdə qısa iş günü olacaq 

Azərbaycan rəsmən AÇIQLADI: Qatar yolunun açılması müzakirə olunur