Rusiya hərbçiləri Azərbaycan ərazisini tərk edərək daimi dislokasiya yerlərinə qayıdıblar.

Oxu24.com xəbər verir ki, bu barədə Rusiyanın Azərbaycandakı səfirliyi məlumat yayıb.

Səfirlik sülhməramlı kontingentin canlı qüvvəsinin və texniki vasitələrinin daşınması ilə bağlı məsələlərinə dəstəyinə görə Azərbaycan tərəfinə minnətdarlığını bildirib.

Vətən Müharibəsindən sonra Azərbaycan ərazisində müvəqqəti yerləşdirilmiş Rusiya Federasiyasının sülhməramlı kontingentinin ölkəmizin ərazisindən çıxarılması prosesi iyunun 12-də başa çatıb.

Sülhməramlıların yerləşdiyi Xocalı hava limanında Azərbaycan bayrağı qaldırılıb. 2023-ci ilin sentyabrın 19-20-də Azərbaycan Silahlı Qüvvələri tərəfindən həyata keçirilən uğurlu antiterror əməliyyatından sonra artıq misiyanın fəaliyyətinə böyük ehtiyac qalmayıb.

2020-ci il noyabrın 10-da imzalanmış üçtərəfli Bəyanata əsasən, Azərbaycan Respublikasının ərazisində müvəqqəti olaraq yerləşdirilmiş Rusiya Federasiyası sülhməramlılarının ölkəmizin ərazisindən vaxtından əvvəl çıxarılması barədə hər iki ölkənin ali rəhbərliyi tərəfindən qərar qəbul edilib.