“Vətəndaş evdən çıxmırsa, polis nə etməlidir?” – Millət vəkili

REDAKTORUN SEÇİMİ

928

08.06.2020, 18:10

Bugün sosial şəbəkələrdə Çevik Polis Alayının Xüsusi təyinatlı qüvvələrinin bir evə daxil olaraq şübhəli şəxsi yatdığı yerdən götürərək apardığı görüntülər yayılıb.

Oxu24.com xəbər verir ki, sərtləşdirilmiş karantin rejimi qaydalarına nəzarət edən asayiş keşikçilərinin üstünə müxtəlif əşyalar atan 11 nəfərin şəxsiyyəti müəyyən edilib və onlar saxlanılaraq müvafiq araşdırmalar aparılması üçün ərazi polis orqanına gətiriliblər.

Mövzu ilə bağlı Qazet.az-ın suallarını cavablandıran Fazil Mustafa qeyd edir ki, vətəndaşlar etirazlarını düzgün formada çatdırmır.

“Vətəndaşın ola bilər ki, polisin hansısa hərəkətindən narazıçılığı olsun, amma bunun qarşılığı çöldə başına zibil yağdırmaq deyil. Daha mədəni formada insanlar münasibət ortaya qoymağa borcludur. Mən hesab edirəm ki, bütün insanlara aid deyil, amma bu məsələdə rolu olan vətəndaşlara çox sərt mövqe ortaya qoyulmalıdır. Əks halda hər kəs belə özbaşınalıq etsə, qanunu pozsa, polisə tabe olmasa, bunun fəsadları çox ağır olar”.

“Polis qaydalara əməl edir və xəbərdarlıq edir, vətəndaş evindən çıxmırsa, nə etməlidir? Polisin qınanılması anlaşılmır. Qaydanı pozmayan kimin evinə polis hücum edir? Polisin nəyinə lazımdır indiki vəziyyətdə narazılıq yaratsın? Polis də bizim vətəndaşımızdır, bizi qoruyan insandır. Buraxa bilməz ki, hər kəs çölə çıxsın və yoluxmanı artırsın”, – deyə Fazil Mustafa bildirib.

Xatırladaq ki, dünən – iyunun 7-də sərtləşdirilmiş xüsusi karantin rejiminə nəzarəti həyata keçirən polis əməkdaşları Yasamal rayonu ərazisindəki yaşayış binalarından birinin həyətində karantin rejimi qaydalarını pozan şəxsi saxlayarkən həmin binada yaşayan bir qrup sakin mənzillərinin eyvan və pəncərələrindən polis əməkdaşlarının üzərinə müxtəlif əşyalar ataraq onların ünvanına təhqiredici ifadələr səsləndiriblər.

Həmçinin oxuyun