Evi sığorta etdirmək üçün hara müraciət etmək lazımdır? — Vəkildən açıqlama

Xəbər verdiyimiz kimi sığortası olmayan evlərin cəriməsi prosesi başlayır.

Məlumat üçün qeyd  edək ki,  Azərbaycan Respublikası İnzibati Xətalar Məcəlləsinin 469-cu maddəsinə əsasən daşınmaz əmlakını sığorta etdirməyən fizki şəxslər üçün 30 manat, vəzifəli şəxslər üçün 80 manat, hüquqi şəxslər üçün isə 200 manat məbləğində cərimə nəzərə tutulub.

İcbari sığorta müqaviləsini bağlamadığına görə şəxs inzibati məsuliyyətə cəlb olunduqda, 20 gün ərzində icbari sığorta müqaviləsini bağlamalıdır. Lakin 20 gün keçdikdən sonra şəxs yenə də icbari sığorta müqaviləsini bağlamamış olarsa, həmin şəxs təkrar məsuliyyətə cəlb olunacaqdır.

Sığorta üçün vətəndaş hara və necə müraciət etməlidir?

Mövzu ilə bağlı Oxu24.com-a danışan vəkil Sadiq  Əfəndiyev bildirib ki,  icbari sığorta müqviləsinin bağlanması elektron qaydada həyata keçirilir.

- Daşınmaz əmlakını sığorta etdirmək istəyən şəxslər İcbari Sığorta Bürosunun iştirakçıları olan istənilən şirkətə yaxud “ASAN xidmət” mərkəzlərinə müraciət edərək icbari sığorta müqaviləsini bağlaya bilər.  Bu zaman bütün sənədləşmələr elektron qaydada aparılır və sonda sığorta müqaviləsinin bağlanmasını təsdiq edən elektron sənəd formasında sığorta şəhadətnaməsi tərtib edilir ki, bu da sığorta müqaviləsinin bağlanmasını təsdiq edir. 

 

Hazırladı: Miri Məcidli