Arxeoloq Saleh Qazıyev haqqında maraqlı FAKTLAR 

Arxeoloq Saleh Qazıyev haqqında maraqlı məlumatı təqdim edirik:

Tarix dərsliklərində adı yalnız Mingəçevirdəki araşdırmalarla bağlı bir cümlə ilə xatırlanan Saleh Mustafa oğlu Qazıyev 1893-cü ildə Oğuz rayonunun Xaçmaz kəndində doğulub.

Əvvəlcə mollaxanada, sonra isə kənddə açılmış "Rövzətül-maarif" adlı məktəbdə oxuyub.

1928–1932-ci illərdə Bakı şəhərində Pedaqoji İnstitutda, 1935–1938-ci illərdə SSRİ Elmlər Akademiyasının Azərbaycan filialının aspiranturasında oxuyub.1941-ci ildə dissertasiya müdafiə edərək tarix elmləri namizədi adına layiq görülüb.

S.Qazıyev həyatının ilk dövrünü xalqın maariflənməsinə həsr edib, 1916–1922-ci illərdə Şəki qəzasının Filfilli kəndində, 1925–1928-ci illərdə Nuxa pedaqoji texnikumunda, 1928–1932-ci illərdə Bakı məktəblərində, 1932–1933-cü illərdə Ağdaş pedaqoji texnikumunda müəllimlik edib, direktor müavini və direktor olub, Nuxa və Ağdaş şəhərlərində maarif şöbəsinin müdiri vəzifəsində çalışıb.

O, 1934–1947-ci illərdə Azərbaycan SSR Tarix Muzeyinin elmi işçisi, 1947–1952-ci illərdə direktoru, 1952–1954-cü illərdə EA Tarix İnstitutunun arxeologiya, sonrakı illərdə isə etnoqrafiya şöbəsinin rəhbəri olub. S.Qazıyev Mingəçevir arxeoloji ekspedisiyasına (1946–1953-cü illər) başçılıq edib.Sayı 20 mindən çox olan Mingəçevir abidələrinin ilk dəfə arxeoloji təsnifatını verib. O, 40-dan çox elmi əsərin və məqalənin müəllifidir.

Azərbaycanda arxeologiyaya aid ilk sanballı əsər olan "Azərbaycan arxeologiyası"nın müəlliflərindən biridir. "Azərbaycanın maddi mədəniyyəti" silsiləsinin 4 cildi onun redaktəsi ilə hazırlanıb. "Azərbaycanın qədim abidələri" (1948), "Qədim Mingəçevir" (1950) əsərləri, "Mingəçevir küp qəbirləri" (1960) albomunun müəllifidir.

Saleh Qazıyev 17 iyul, 1971-ci ildə Bakıda vəfat edib...

ALLAH RƏHMƏT ELƏSİN!

Müəllif: Tarixçi Namiq Həsənov

Həmçinin oxuyun

18 mayda bizi nələr gözləyir? - ULDUZ FALI

Netanyahu Trampla danışacaq 

Avtomobildə bunu edənlər yolda saxlanılacaq — 500 manat cəriməsi var 

Kredit götürənin sosial yardımı kəsiləcək? - VACİB AÇIQLAMA