"Məsələ Azərbaycanın Ukraynadakı səfirliyinin nəzarəti altındadır".

Bunu APA-ya açıqlamasında Azərbaycanın Ukraynadakı səfirliyinin ikinci katibi Samir Allahverdiyev bildirib.

S. Allahverdiyev baş verən hadisə ilə bağlı Ukrayna polisinin cinayət işi açdığını qeyd edib: "Səfirlik əməkdaşları tərəfindən xəsarət alan soydaşlarımız ziyarət olunub, vəziyyətləri yaxşıdır, həyatlarına təhlükə yoxdur".

14:41

Ukraynanın paytaxtı Kiyevdə iki azərbaycanlı tələbəyə atəş açılıb.

APA-nın "Strana" portalına istinadən verdiyi məlumata görə, naməlum şəxslər iyulun 25-nə keçən gecə Konovaltsya küçəsində, "Montekki və Kapuletti" restoranının yaxınlığında "Mercedes-Gelenvagen" markalı avtomobildən azərbaycanlı tələbələrə tapançadan atəş açıblar.

Bildirilir ki, atəşin açıldığı 50 RV 100 dövlət nömrə nişanlı avtomobilin və hadisəni törədən şəxslərin tapılması üçün hüquq-mühafizə orqanları hərəkətə keçib.

Məlumatda o da qeyd olunur ki, ayağından yaralanan Azərbaycan vətəndaşı Nicat Kərimov Kiyev şəhər 8 saylı Kilinik Xəstəxanaya yerləşdirilib. Digər şəxs – 2000-ci il təvəllüdlü Azər Abbasov da ayağından yaralanıb, ona tibbi yardım göstərilib, lakin xəstəxanaya yerləşdirilməsinə ehtiyac olmayıb. 

Hadisənin ermənilər tərəfindən törədildiyi ehtimal edilir.