Ötən il Bakı şəhərinin Nizami rayonu ərazisində ağır yol-nəqliyyat hadisəsi törətmiş Rəcəb Rəhimov barəsində açılan cinayət işinin ibtidai istintaqı başa çatıb.

News24.az-ın məlumatına görə, onun barəsində Cinayət Məcəlləsinin 263-1.3-cü, yəni, yol hərəkəti və ya nəqliyyat vasitələrinin istismarı qaydalarını sərxoş halda və ya nəqliyyat vasitələrini idarə etmək hüququ olmayan şəxs tərəfindən pozma ölümlə nəticələndikdə maddəsi ilə açılan işin materialları Bakı Ağır Cinayətlər Məhkəməsinə göndərilib. İstintaq zamanı sürücünün sərxoş olması və ya sürücülük vəsiqəsinin olmaması məlum olub.

Məhkəmə prosesi hakim Zeynal Ağayevin sədrliyi ilə keçiriləcək.

Qeyd edək ki, cinayət işi üzrə 3 nəfər zərərçəkən şəxs qismində tanınıb. Belə ki, taksi fəaliyyəti ilə məşğul Məmmədov Pünhan Valeh oğlu idarə etdiyi "90-HX-930 dövlət nömrə nişanlı "Tofaş" markalı avtomobil Heydər Əliyev prospektində yüksək sürətli hərəkətdə yolda olarkən dayanmanın qadağan olunduğu hissədə anidən dayanıb. Bu zaman avtomobildə olan sərnişin düşərək yolu keçmək istəyib.

Nəticədə arxadan yüksək sürətlə gələn 99-MH-889 dövlət nömrə nişanlı "Mercedes Vito" markalı nəqliyyat vasitəsi sərnişini vurub. Yaralı aldığı xəsarətlərdən hadisə yerində keçinib.
Əraziyə Nizami Rayon Polis İdarəsinin və DYP əməkdaşları cəlb edilib.