Rusiya və Pakistan uzunmüddətli neft tədarükü ilə bağlı danışıqlar aparır

Pakistan və Rusiya hazırda İslam ölkəsinə Rusiya neftinin tədarükü üçün uzunmüddətli müqavilənin texniki detallarını müzakirə edirlər.

 

Oxu24.com xəbər  verir  ki,bu barədə RİA Novosti-yə Pakistanın Moskvadakı səfiri Məhəmməd Xalid Camali məlumat verib.

 

Onun sözlərinə görə, dialoq həm hökumət səviyyəsində, həm də özəl şirkətlər səviyyəsində gedir.

Diplomat uzunmüddətli müqavilə ilə bağlı danışıqlarda heç bir çətinlik olmadığını, texniki detallar, o cümlədən qiymətlər, satınalmaların həcmi və s. üzrə müzakirələrin davam etdirildiyini bildirib.

Səfir əlavə edib ki, əməliyyatda hansı valyutalardan istifadə oluna biləcəyi ilə bağlı bütün variantlar nəzərdən keçirilir.

O əlavə edib ki, Pakistan əvvəllər barter ticarəti ilə məşğul olub, ona görə də ödəniş məsələləri mütləq həll olunacaq.

Energetika naziri Nikolay Şulqinov da bildirib ki, Rusiya Pakistanla bu ölkəyə uzunmüddətli neft tədarükünü müzakirə edib, danışıqlar hələ də davam edir.

Bundan əvvəl Pakistan öz şirkətləri üçün Rusiya neftinin birbaşa idxalını açmışdı.

 

Müəllif: Miri Məcidli