Yusif Əhmədovu indiyə kimi idmançı kimi tanıyırdıq. Kempo-karate idman növü üzrə 4 qat dünya, 2 qat Avropa çempionu, (Heydər Əliyev kəmərinin sahibi) əməkdar idman ustasıdır. 44 günlük Vətən müharibəsi isə bizə onu həm də qəhrəman döyüşçü kimi tanıtdı. Oktyabrın 20-dən torpaqlarımızın azadlığı uğrunda mübarizəyə o da qoşulub.

Oxu24.com qafqazinfo-ya istinadən xəbər verir ki, Füzulidən başlayan döyüş yolu Xocavəndə qədər davam edib.

"Cəbhəyə getmək üçün Səfərbərlik Xidmətinə 4 dəfə müraciət elədim, nəhayət, oktyabrın 20-də apardılar. Füzulidən döyüşə başladıq, Qacar və digər kəndlərin alınmasında iştirak etdik. Xocavəndə qədər gedib çıxdıq.

Noyabrın 5-6-da Xocavənd istiqamətində döyüşlərdə iştirak etmişik və orada maşınımız minaya düşərək 11 metrlik təpədən aşağı yuvarlanıb. İki şəhid verdik, 9 yaralımız oldu.

Mən də ağır yaralıların içərisində idim. Sağ ayağımda sınıq, sümükdən aralanma, sağ və sol bel fəqərələrimdə sınıqlar var, sinir sistemim zədələnib, beyin silkələnməsi nəticəsində gözlərim zəifləyib. Hazırda səhhətim yavaş-yavaş yaxşılaşır. Düzəlməsə də, həkimlər çalışır ki, qaydasında saxlasınlar, bundan sonra pisləşməsin".