Qazaxıstan Rusiya ilə ərazi mübahisəsinin olmadığını açıqlayıb

Qazaxıstan hökumətinin Rusiyadan mümkün ərazi iddiaları ilə bağlı heç bir narahatlığı yoxdur.

Oxu24.com TASS-a istinadən xəbər verir ki, bunu Almaniya kansleri Olaf Şolzla danışıqların yekunu üzrə mətbuat konfransı zamanı respublika prezidenti Kasım-Jomart Tokayev deyib.

Dövlət başçısı qeyd edib ki, Moskva ilə Astana dostluq münasibətlərini davam etdirir. Bundan əlavə, Rusiya Federasiyası və Qazaxıstan müxtəlif inteqrasiya birlikləri çərçivəsində mütəmadi olaraq qarşılıqlı fəaliyyət göstərirlər.

“Rusiyanın ərazi iddiaları ilə bağlı heç bir narahatlığımız yoxdur”, - Tokayev vurğulayıb.

O əlavə edib ki, vaxtilə Moskva və Astana iki ölkə arasında sərhədi demarkasiya edib. Üstəlik, Rusiya və Qazaxıstan parlamentləri tərəfindən ratifikasiya edilib.

Tokayevin dediyi kimi, iki dövlət arasında humanitar sahədə və ticarət sahəsində əməkdaşlıq ənənəsi mövcuddur. Eyni zamanda, 10 il əvvəl Rusiya Federasiyası ilə Qazaxıstan arasında müttəfiqlik münasibətləri haqqında saziş imzalanıb.

Həmçinin mətbuat konfransı zamanı respublika başçısı Qazaxıstanın Almaniyaya ixrac etdiyi neftin həcmini artırmağa hazır olmasından danışıb. Onun sözlərinə görə, 2023-cü ilin əvvəlindən Astana Drujba kəməri ilə Almaniya ərazisinə 500 min ton yanacaq tədarük edib.

Sentyabrın 25-də Qazaxıstan və Rusiya Federasiyasının 2023-cü ildə respublikaya benzin tədarükünü genişləndirmək üçün danışıqlar apardığı bildirilib. “İnterfaks” agentliyinin məlumatına görə, söhbət xaricə ixrac olunan yanacağın həcminin təxminən 3 dəfə - hazırkı 40 min tondan 110 min tona qədər artırılmasından gedir.

 

Müəllif: Nigar