“Müharibədən bir neçə gün sonra Putin...” – Erməni generaldan şok iddia

“Nikol Paşinyanın istefasını tələb edirik. Nikol Paşinyanın gedəcəyi aydındır, onun hakimiyyətdə qalması qeyri-mümkündür. Bu qərarı 10 gün əvvəlversəydi, bu gün sərhəd bölgəsi Vardenisdən keçməzdi, Ermənistanın təhlükəsizliyi təhdid altına düşməzdi, Dadivank (Xudavəng) monastrı azərbaycanlıların nəzarəti altında olmazdı”.

Teleqraf.com xəbər verir ki, bunu Ermənistan Milli Təhlükəsizlik Xidmətinin keçmiş rəisi general Artur Vanetsyan söyləyib.

Artur Vanetsyan Paşinyanın istefa vermək istəməməsinin ölkə iqtisadiyyatına ciddi ziyan vurduğuna inandığını bildirib:

“Nikol Paşinyan nə qədər ki vəzifəsindədir, iqtisadiyyatımız gəlirlərini itirəcək, vətəndaşlar yoxsullaşacaq. Nikol Paşinyanın hər gün hakimiyyətdə olması onun oğurluq etməsi deməkdir. Qərar verməlidir. Olub-keçənlərə baxmayaraq, Nikol Paşinyanın fiziki təhlükəsizlik zəmanətinə sahib olması üçün hər şeyi edəcəyik. Ancaq kreslosundan yapışmağa çalışması böyük bir problem yaradır.

Biz sona qədər mübarizə aparacağıq. Nikol Paşinyan artıq Ermənistanın baş naziri ola bilməz. Müharibədən əvvəl onunla siyasi müzakirə apara bilərdik, ancaq müharibədən sonra vəzifəsində qalmaq üçün nə mənəvi, nə də hüquqi əsası var. Ermənistan Respublikası və erməni xalqı məğlub liderə sahib ola bilməz”.

Artur Vanetsyana görə, ən böyük problem Nikol Paşinyanın qərar qəbul edə bilməməsidir:

“Müharibə sentyabrın 27-də başladı. Sentyabrın 27-dən bir neçə gün sonra Baş Qərargah rəisi Nikol Paşinyana müqavimət göstərməyə hazır olmadığımızı, bu müharibəni uduzacağımızı və bunun tez bir zamanda dayandırılmalı olduğunu bildirdi. Nikol Paşinyan belə bir qərar vermədi. O gün bir qərar versəydi, bəzi əraziləri itirərdik, ancaq böyük itki olmazdı”.

General Nikol Paşinyanın 19-20 oktyabr tarixlərində Rusiya Prezidenti Vladimir Putinin təklif etdiyi qərarla razılaşmadığı bir başqa epizodu xatırladıb.