İran ABŞ tərəfindən İraqda öldürülən general Qasım Süleymanini satan şəxsi edam edəcək.

Oxu24.com  xəbər verir ki, bu barədə İran Məhkəmə Hakimiyyətinin sözçüsü Qulam Hüseyin İsmaili deyib.

Onun sözlərinə görə, Mahmud Musevi Mecd adlı şəxs Mossad və CİA-ya casusluq edib:

“O, Süleymaninin olduğu yerin məlumatlarını bu xüsusi xidmət orqanlarına verib. Bununla yanaşı, Mecd pul qarşılığında İnqilab Keşikçiləri Korpusunun Qüds elit bölüyü başda olmaqla ölkənin silahlı qüvvələri haqqında məlumatları CİA və MOSSAD-a satıb. Mecdlə bağlı Yüksək Məhkəmənin də təsdiqlədiyi cəza yaxın günlərdə həyata keçiriləcək”.

Qeyd edək ki, bu ilin 3 yanvar tarixində İnqilab Keşikçiləri Korpusunun Qüds elit bölüyünün rəhbəri Qasım Süleymani və İranın dəstəklədiyi Haşdi Şabi qüvvələrinin sədr müavini Əbu Mehdi əl-Mühendisi ABŞ-ın Bağdad hava limanında keçirdiyi əməliyyat zamanı öldürülüb.