Okeanlarda temperatur rekord həddə çatdı - Xəbərdarlıq

DÜNYA

322

26.08.2026, 11:27

Xəbərlərimizi Google-da izləyin

Yeniliklərdən dərhal xəbərdar olun

Abunə ol

Dünya okeanlarında indiyədək qeydə alınan ən yüksək okean səthi temperaturu müşahidə olunub.

Oxu24.com xəbər verir ki, “Bloomberg”in məlumatına görə, Avropanın Yer səthinin monitorinq proqramı olan “Kopernik”in məlumatları qlobal okean səthinin orta temperaturunun avqustun 22-də 21,1 dərəcə Selsiyə yüksəldiyini göstərir. 1979-cu ildən etibarən müntəzəm aparılan müşahidələrdə bu, ən yüksək göstərici hesab olunur.

Bununla da 2024-cü ilin martında qeydə alınmış əvvəlki rekord yenilənib. Həmin vaxt qlobal okean səthinin orta temperaturu 21,09 dərəcə Selsi təşkil edib.

Alimlərin fikrincə, rekord temperaturun yaranmasına bir neçə amil təsir göstərib. Bunların arasında El Niño fenomeni və insan fəaliyyətinin səbəb olduğu uzunmüddətli qlobal istiləşmə xüsusi rol oynayır.

Mütəxəssisləri xüsusilə narahat edən məqam rekordun avqust ayında qeydə alınmasıdır. Çünki qlobal okean səthinin ən yüksək orta temperaturu adətən Cənub yarımkürəsində yay mövsümünün sonlarına uyğun gələn mart və aprel aylarında müşahidə olunur.

Okeanların istiləşməsi yalnız dəniz ekosistemləri üçün deyil, qlobal iqlim sistemi üçün də ciddi nəticələr yarada bilər. Daha isti sular dəniz səviyyəsinin yüksəlməsinə və ekstremal hava hadisələrinin intensivləşməsinə təsir göstərə bilər.

İsti okeanlar atmosferə daha çox istilik və rütubət ötürür. Bu isə bəzi regionlarda güclü fırtınaların, anomal istilərin və digər ekstremal hava hadisələrinin yaranması üçün əlverişli şərait yaradır.

Digər tərəfdən, okeanların temperaturunun yüksəlməsi onların karbon qazını udmaq qabiliyyətinə də təsir edir. Daha isti suların atmosferdən daha az karbon qazı udması nəticəsində istixana qazlarının səviyyəsi arta və qlobal istiləşmə prosesi daha da sürətlənə bilər.

Alimlər hesab edirlər ki, okean temperaturundakı dəyişikliklərin davamlı şəkildə izlənilməsi və bu dəyişikliklərin iqlim sisteminə təsirlərinin daha dərindən araşdırılması vacibdir.

Həmçinin oxuyun