Maduronu necə tutublar? —   150-DƏN ÇOX HƏRBİ TƏYYARƏ GEDİBMİŞ

ABŞ Silahlı Qüvvələrinin Baş Qərargah Rəisləri Komitəsinin sədri Den Keyn Venesuela Prezidenti Nikolas Maduronun saxlanılması ilə nəticələnən əməliyyatın aylarla davam edən dəqiq və koordinasiyalı planlaşdırmanın nəticəsi olduğunu bildirib.

Oxu24.com  xəbər verir ki, Florida ştatında, Mar-a-Laqo iqamətgahında keçirilən mətbuat konfransında çıxış edən general Keyn qeyd edib ki, əməliyyat bütün hərbi bölmələr və kəşfiyyat qurumları arasında uzunmüddətli birgə əməkdaşlıq əsasında həyata keçirilib.

Generalın sözlərinə görə, hazırlıq mərhələsində Maduronun gündəlik hərəkətləri, həyat tərzi, səyahət marşrutları və hətta geyim vərdişlərinə qədər bütün detallar diqqətlə izlənilib.

Bildirilib ki, ötən yay Mərkəzi Kəşfiyyat İdarəsi tərəfindən Venesuelaya yerləşdirilən kiçik qrup Maduronun fəaliyyətini real vaxt rejimində nəzarətdə saxlayıb.

Cümə gecəsi başlayan əməliyyat çərçivəsində 20 fərqli quru və dəniz bazasından 150-dən çox hərbi təyyarənin havaya qalxdığı açıqlanıb. Əməliyyatın əsas hissəsini xüsusi təyinatlı qüvvələri daşıyan helikopterlər təşkil edib. Onlar radar aşkarlanmasından yayınmaq məqsədilə su səthindən cəmi 30 metr yüksəklikdə uçublar.

Strateji obyektlərə endirilən zərbələrlə qorunan helikopterlər yerli vaxtla təxminən saat 01:00 radələrində Maduronun olduğu əraziyə çatıb.

Açıqlamada qeyd olunub ki, Maduro və həyat yoldaşının saxlanılması zamanı ABŞ qüvvələri atəşə məruz qalıb və bir neçə “özünümüdafiə xarakterli toqquşma” baş verib.

Əməliyyat qüvvələri saat 03:29-da Venesuela ərazisini tərk edərək, Nikolas Maduro və onun həyat yoldaşını müvəqqəti saxlanma üçün “USS Iwo Jima” hərbi gəmisinə köçürüblər. Onların daha sonra Nyu-Yorka aparılacağı bildirilib.

General Keyn vurğulayıb ki, əməliyyat zamanı bir ABŞ hərbi təyyarəsi zərər görsə də, uçuş qabiliyyətini qoruya bilib və tapşırığını yerinə yetirib. Bütün hava vasitələri təhlükəsiz şəkildə bazalarına qayıdıb.(Qafqazinfo)

Həmçinin oxuyun

8 gün iş OLMAYACAQ  —  TƏQVİM

Tələbə qızı dəm qazından boğulmuşdu - 3 il sonra qəzada öldü 

Moskvadan Bakıya qonaq gəlmişdilər - Faciəvi şəkildə öldülər 

3 avqustda bizi nələr gözləyir? — ULDUZ FALI