Çin lideri Si Cinpin Belarus prezidenti Aleksandr Lukaşenkoya zəng edərək onu yenidən dövlət başçısı seçilməsi münasibətilə təbrik edib.

Oxu24.com xəbər verir  ki, bu barədə Çin Mərkəzi Televiziyası məlumat yayıb.

Si Cinpinin sözlərinə görə, son illər o, Belarus lideri ilə sıx əlaqələr saxlayıb və ikitərəfli münasibətlərin inkişafı üçün birgə tədbirlər həyata keçirib. Respublika başçısının qeyd etdiyi kimi, bunun sayəsində Pekin və Minsk arasında qarşılıqlı fəaliyyət “hərtərəfli strateji tərəfdaşlığın ən yüksək səviyyəsinə” çatıb.

"Mən Çin-Belarus münasibətlərinin inkişafına böyük əhəmiyyət verirəm və iki ölkə arasında ənənəvi dostluğu davam etdirmək və qarşılıqlı faydalı əməkdaşlığı dərinləşdirmək üçün cənab Prezident [Belarus] ilə işləməyə hazıram", - Çin sədri vurğulayıb.

O, Minsk və Pekin arasında münasibətlərin hər iki ölkə vətəndaşlarının mənafeyinə uyğun olaraq bundan sonra da inkişaf edəcəyinə ümidvar olduğunu bildirib.

Belarusda prezident seçkiləri 2025-ci il yanvarın 26-da keçirilib. Hazırkı dövlət başçısı Aleksandr Lukaşenko seçkilərdə qalib gəlib, ilkin məlumatlara görə, seçicilərin 86,82 faizi onun namizədliyini dəstəkləyib.

Bundan əvvəl Rusiya lideri Vladimir Putin belaruslu həmkarını yenidən prezident seçilməsi münasibətilə təbrik edib.

Nigar