Latviya bankları ölkənin müdafiəsi naminə vergiyə cəlb olunacaq

Latviya hökuməti müdafiə xərclərini artırmaq üçün üç il müddətinə maliyyə sektorunun mənfəət vergisinin tətbiqini təsdiqləyib.

Oxu24.com xəbər verir  ki, bu barədə Bloomberg yazır.

Agentliyin məlumatına görə, bankların xalis faiz gəlirlərinə yönəlmiş yeni verginin 2025-ci ildə büdcəyə 93 milyon avro, növbəti iki ildə isə hər il 85 milyon avro daxil olacağı gözlənilir. Eyni zamanda kreditləşməni artıran maliyyə qurumları vergi yükünü azalda biləcək.

Latviyanın maliyyə naziri Arvils Aseradens hökumətin iclasından sonra deyib: "Bu qanun dövlətin milli təhlükəsizlik sahəsində fiskal ehtiyaclarını ödəmək üçün əlavə resurslar tapmağa kömək edəcək".

Latviya 2022-ci ildə Ukraynada hərbi əməliyyatlar başlayandan bəri müdafiə xərclərini artırır. Bu ölkə Kiyevi silahla təmin edir və Moskvaya qarşı sanksiyaların sərtləşdirilməsini fəal şəkildə müdafiə edir.

Qüvvəyə minməsi üçün “həmrəylik töhfəsi” adlanan qanun layihəsi parlament tərəfindən təsdiq edilməli və prezident Edqars Rinkeviçs tərəfindən imzalanmalıdır.

Sentyabrın ortalarında məlum olub ki, Ukrayna 2025-ci ildə yeni vergi artımı ilə üzləşə bilər. Maliyyə Nazirliyindən verilən məlumata görə, BVF-nin proqramında büdcədə ciddi dəyişikliklər olduğu halda belə bir tədbir nəzərdə tutulub. Artım ƏDV və bank vergilərinə təsir edə bilər. Bu tədbirlərin oktyabrın əvvəlindən həyata keçirilməsi planlaşdırılır.

Bundan əvvəl Ukraynada müharibə vergisinin artırılması çağırışı olub.

 

Nigar