İlon Mask Fransada həbs edilən Pavel Durovun azadlığa buraxılmasına çağırıb

Amerikalı sahibkar İlon Mask Fransa hakimiyyətini Telegram messencerinin qurucusu Pavel Durovu azad etməyə çağıran sosial şəbəkə istifadəçilərini dəstəkləyib.

 

Oxu24.com  xəbər verir  ki, bu barədə milyarderin X platformasındakı (keçmiş Twitter) hesabında məlumat paylaşılıb.

"#FreePavel" iş adamı yazıb.

 

Avqustun 24-də hüquq-mühafizə orqanlarının əməkdaşları Durovu Fransanın Le Burje hava limanında saxlayıblar. Telegram-ın təsisçisi yerli vaxtla saat 20:00 radələrində (Bakı vaxtı ilə 22:00) şəxsi təyyarədən çıxarkən nəzarətə götürülüb.

LCI telekanalının məlumatına görə, daha sonra sahibkar həbs edilib. Jurnalistlər onun Fransaya Azərbaycandan gəldiyini də əlavə ediblər.

Fransa hakimiyyətinin Durova qarşı əsas şikayəti Telegram-da mesajların şifrələnməsidir. Bunun fonunda iş adamı terror, fırıldaqçılıq, çirkli pulların yuyulması və qadağan olunmuş maddələrin qanunsuz dövriyyəsində ittiham oluna bilər. Onun günahı sübuta yetirilərsə, messencerin təsisçisini 20 ilə qədər həbs gözləyir.

Baş verənləri şərh edən Rusiya Federasiyası Xarici İşlər Nazirliyi vəziyyətin aydınlaşdırılması üçün bütün lazımi tədbirləri gördüyünü açıqlayıb.

Bir müddət əvvəl amerikalı aparıcı Taker Karlson Pavel Durovun həbsindən danışıb.

 

Miri