Qərb siyasi motivlərlə rus iş adamlarına qarşı sanksiyalar tətbiq etməklə “böyük səhvə” yol verdi.

Rusiyalı milyarder Əlişir Usmanov belə hesab edir.

“Corriere Della Sera” qəzetinə müsahibəsində Usmanov deyib ki, sanksiyalara məruz qalan rusiyalı iş adamları transmilli şirkətlər qurub, xaricə aktiv sərmayə qoyublar və indi onlar yalnız ölkə daxilində işləməli olurlar. Milyarder əmin edir ki, bundan Qərb ölkələri özləri əziyyət çəkir.

Usmanovun Avropaya girişi qadağan olunduğu üçün o, Egey dənizinin Türkiyə sahilindəki villasında “Corriere Della Sera”nın jurnalisti ilə görüşüb.

Sanksiyaların əsassızlığını izah edən Usmanov nəşrə bildirib ki, iri biznesmenlər Rusiya hakimiyyətinin “qərar qəbul etmə prosesinə təsir göstərmirlər”.

Usmanov Rusiyanın Ukraynaya qarşı müharibəsindən danışarkən qeyd edir ki, “davamlı sülh yalnız ağıl və kompromis əsasında mümkündür, buna bütün tərəflər arasında danışıqlar yolu ilə nail olmaq olar”. “Rusiya regionda sabitliyin təminatçısı kimi çıxış edə bilərmi” sualına Usmanov belə cavab verib: “Biz qarşılıqlı faydalı və ya ən azı məqbul razılaşmalar əsasında birgə yaşamağa çalışmalıyıq. Çoxqütblü dünyada Avrasiya regionunun təhlükəsizliyi Rusiya, Çin, Mərkəzi Asiya ölkələri, Türkiyə və Aİ-nin maraqlarını nəzərə almalıdır”.

Miri