Yaponiya müdafiə büdcəsini rekord səviyyəyə qaldıracaq

Yaponiya gələn il müdafiə büdcəsini rekord həddə - 54 milyard dollara çatdırmaq istəyir.

 

Kyodo xəbər verir ki, buna səbəb Çindən gələn təhdidlər olub.

 

Nəşr öz mənbələrinə istinadən qeyd edir ki, Yaponiya Müdafiə Nazirliyi 2025-ci maliyyə ili üçün 54 milyard dollarlıq rekord büdcə tələb etməyi planlaşdırır.

Xüsusilə, rekord büdcəyə "Çinin artan hərbi iddialılığı" fonunda ucqar adaları daha yaxşı qorumaq üçün pilotsuz təyyarələrin yerləşdirilməsi tələbi daxil olacaq. Söhbət Tayvana yaxınlığına görə strateji əhəmiyyət kəsb edən Nansey adaları zəncirindən gedir.

Hökumətin 2027-ci ilə qədər müdafiə xərclərini 43 trilyon yen maliyyələşdirməyi vəd etməsindən sonra Yaponiya müdafiə büdcəsini kəskin şəkildə artırıb. Müdafiə Nazirliyinin cari il üçün büdcəsi 7,9 trilyon yendir və həm də ölkə tarixində ən böyük büdcədir.

Yaponiyada uzun illər ərzində illik müdafiə xərcləri ÜDM-in təqribən 1 faizi və ya 5 trilyon yendən bir qədər çox ilə məhdudlaşırdı. Lakin 2022-ci ildə Yaponiya hökuməti Şimali Koreyadan gələn təhdidlərə görə təhlükəsizlik sənədlərini yenilədi.

 

Miri