İran prezidenti Məsud Pezeşkian parlamentin iclasında çıxışı zamanı bildirib ki, İran ağır iqtisadi vəziyyətdədir, ölkə xalqı bədbəxtdir.

Oxu24.com xəbər verir ki, bu barədə  “Anadolu” məlumat yayıb.

"Bu, Amerika və ya əcnəbilərin deyil, bizim günahımızdır", deyə  İran prezidenti bildirib.

“Ölkə ağır vəziyyətdədir, insanlar isə ağır iqtisadi vəziyyətdədir. İqtisadi, sosial, ekoloji, təhsil və mədəniyyət sahələrində ədalətsizlik və disharmoniya hamıya təsir edir”, - deyə prezident qeyd edib.

Məsud Pezeşkian çıxışında xüsusilə ədalət məsələsinə diqqət çəkib: “Hökumətin vəzifəsi ədalətli davranmaq, yəni xalqı razı salmaqdır. Bu, bütün qəlbimizlə inandığımız bir prinsipdir. Heç bir din, heç bir iman, heç bir imam, heç bir peyğəmbər heç bir insan üçün ədalət hüdudlarından kənara çıxmamışdır. Dindar olub-olmaması, türk, fars, ərəb, əcnəbi və ya yerli olması fərq etməz. Bütün mübarizə ədalətlə bağlıdır”.

İslam Respublikasına qarşı təhdidlərə gəlincə, İran prezidenti bildirib ki, əsas ABŞ-dır: “Amerika sanksiyalar tətbiq edir, amma birləşsək, bu təhdidləri aradan qaldıra bilərik. Bölgədə gərginlik, müharibə, qan tökülməsi hökm sürür. Qonşularla münasibətlərimiz zəifləyib, sosial kapitalımız azalıb, daxili bütövlüyümüz zəifləyib, hakimiyyətin millət qarşısında nüfuzu zəifləyib. Bunlar bizim zəif cəhətlərimizdir”.

Pezeşkian əmin edib ki, hakimiyyət ölkədə yoxsulluğun azaldılması üçün səylərini davam etdirəcək. “Biz bu xalqa xidmət etmək üçün gəlmişik, onu idarə etmək üçün deyil. Dövlət xidmət aləti olmalıdır, əks halda əhəmiyyətsiz və faydasızdır”.

Miri