Təhsil Nazirliyi niyə Sinqapur modelini seçdi? - Ekspert bu sistemin üstün və zəif cəhətlərini AÇIQLADI

Xəbər verdiyimiz kimi Təhsil Nazirliyi riyaziyyat fənni üzrə təhsil proqramının və ümumitəhsil müəssisələrində istifadə edilən dərsliklərin Sinqapur modelində olacağı barədə məlumat yayıb.

Maraqlıdır, Sinqapur modelinin seçilməsinə səbəb nədir? Bu modelin təhsilin inkişafına faydası olacaqmı?

Məsələ ilə bağlı Sfera.az-a danışan təhsil eksperti Kamran Əsədov Sinqapur təhsil modelinin dünya üzrə kifayət qədər uğurlu olduğunu bildirib:

"İlk növbədə qeyd edim ki, Sinqapur təhsil sistemi öz göstəricilərinə görə dünya üzrə inkişaf etmiş ölkələrlə eyni sıradadır. Eyni zamanda orada riyaziyyat fəninin tədrisi bütün dünya ölkələrindən fərqlənir. Tək Azərbaycan yox, bütün dünya təhsil sitsemi Sinqapur təhsil sistemidən çox şey öyrənməlidir.

 

1965-ci il Malaziya müstəqilliyini qazandıqdan sonra məhdud təbii sərvətə malik olan ən yoxsul ölkələrdən biri də Sinqapur olub. Burda yanlız elit təbəqənin təhsili var idi və əhalinin oxuma yazma bacarığı aşağı səviyyədə idi. Lakin bu gün sinqapurlu şagirdlərin xüsusilə riyaziyyat sahəsi üzrə bilgiləri bütün inkişaf etmiş ölkələrin şagirdlərinin biliklərindən öndədir. Həmin şagirdlər məktəbi bitirdikdən sonra ən yaxşı universitetlərə daxil ola bilirlər. Sinqapurda sərt nizam-intizam tələb edən təhsil sistemi var və müəllimlər ilkin olaraq 1500-1600 manat civarında təqaüd alırlar. Bu ölkədə büdcənin 20-25 faizi təhsil sisteminə ayrılır".

Təhsil eksperti yeni modeli tədris edən müəllim heyətinin olmamasından da söz açıb:

"Lakin bu sistemdə də çatışmazlıq var. Çünki sərt təhsil sistemin olması məktəblilərin intihara meyilliyini də artırır. Buna baxmayaraq ölkənin 95 faizi təhsillidir. Sinqapur dərslikləri Azərbaycanda bir neçə təhsil pilləsində yox, bütövlükdə tətbiq edilməlidir. Lakin bir yandan da bu sistemi tədris edəcək müəllim heyəti yox dərəcəsindədir. Bu baxımdan Sinqapur modelinin təbiqindənsə Azərbaycanda dərsliklərin sadələşdirilməsi daha effektiv olar".