Sağlam olduğunuzu göstərən 5 əlamət – Sizə qibtə etmək olar?

Elmi izaha görə, sağlam olmaq - tam fiziki, mənəvi, ruhi tarazlıq və sağlamlıqdır. Sağlam olmaq təkcə hər hansı ağır xəstəliyin olub-olmaması ilə ölçülmür.

Bir çox xəstəliklər var ki, gizli gedir, əlamət vermir, illərlə özünü göstərmir, amma insan özünü normal sağlam hesab edir.
Oxu24.com medicina.az-a istinadən bir insanın fiziki sağlam olduğunun əsas 5 əlamətini təqdim edir.

Əgər bunlardan 3-ü sizdə varsa, fiziki baxımdan ciddi probleminizin olmadığını bilmək olar:

1. Həzm sisteminiz saat kimi işləyir

Normal həzm odur ki, insan normal qidalanır, iştahı, dadbilməsi var, yediklərini həzm edir, tualetə normal gedir, nəcis norma həddindədir, qarnında qida qəbulundan sonra heç bir ağırlıq, köp olmur. İnsan yediyindən həzz alır və doyur.

2. Bədəninizdən pis və kəskin qoxu gəlmir

Hər bir insanın özünəməxsus qoxusu var. Amma kəskin, xoşagəlməz, kənardan hiss olunan qoxular orqanizmdə hormonal, maddələr mübadiləsi və mineral pozulmasına işarədir.

Ağızdan qoxu bakteriya, diş, damaq, mədə-bağırsaq problemini göstərir. Sağlam insanın qoxusu neytral olmalıdır.

3. Gün ərzində gümrahsız

Tez yorulmaq, bir iş görmədən halsızlıq, zəiflik, səbəbsiz usanmalar artıq həyəcan siqnalıdır. Sağlam adam işdən axşama yaxın yorulur, yuxuya normal, tədricən gedir, səhər isə gümrah oyanmalıdır.

Halsızlıq, tez yorulma ürək, hormonal problem, vitaminsizlik əlamətidir.
Yorğunluğu qida, yatmaq, istirahət azaltmırsa, deməli, problem dərindir.

4. Yuxunuz normaldır, tədricən yuxuya gedib, tədricən də ayılırsız

Alimlər bildirir ki, yastığa başını qoyan kimi yatmaq ciddi yorğunluq və halsızlığın əlamətləridir. Normal sağlam insan tədricən, 15 dəqiqə ərzində yuxuya getməlidir və eləcə də yuxudan qəfil oyanmamalıdır.

Yuxuda gecə yarı oyanmaq, öskürək, boğulma, xorultu - sağlam insanda olmamalıdır. Tez-tez sidiyə getmək də xəstəlik əlamətidir: qan dövranı pozğunluğu, ürək, böyrək və şəkər.

Əgər səhər saatın, zəngin səsinə reaksiya verib, dərhal oyanmırsızsa, elə yatmaq istəyirsizsə, siz tükənmiş insansınız.
Normal yuxu 7-8 saatdır.

5. Dəriniz təmiz, saç və dırnaqlarınız möhkəmdir

Qədimdə insanın xəstə olub olmamasını birinci dırnaqları, dişi və dərisinin vəziyyəti ilə təyin edirdilər.
Əgər dırnaqlar laylanıb qırılırsa, rəngi çəhrayı deyilsə, dəri quru, iltihablı, səpkilidirsə, bir neçə daxili probleminiz var.