"Dostluq bərabərlikdir, ağıl öyrətmək yox" -Telli Pənahqızı

Azərbaycanda məktəbli qızların hicabla məktəbə gəlməsi məsələsi ətrafında müzakirələr gedir. Hər kəsin bu məsələyə münasibəti ola bilər. Mənim də var. Ancaq məni başqa bir məqam düşündürür: niyə bəzi qonşularımız Azərbaycanın daxili məsələləri ilə bağlı özlərinə söz haqqı görürlər?  

Bunu Oxu24.com-a açıqlamasında  Azərbaycan Milli Televiziya və Radio Şurasının üzvü, Teleradio Akademiyasının rektoru, şairə, publisist, nasir Telli Pənahqızı  bildirib.

"Biz müstəqil dövlətik. Öz dövlətçilik ənənələrimiz, qanunlarımız, təhsil siyasətimiz, milli maraqlarımız var. Övladlarımızın hansı təhsil mühitində yetişməsi, məktəblərimizin hansı prinsiplərlə fəaliyyət göstərməsi Azərbaycanın özünün həll edəcəyi məsələdir.Xüsusilə də özlərini bizə dost adlandıran İran və Türkiyədən gələn iradlar sual doğurur. Dostluq başqa dövlətin daxili işlərinə qarışmaq, ona ağıl öyrətmək deyil. Əsl dostluq qarşılıqlı hörmətə, suverenliyə və bir-birinin seçiminə sayğıya əsaslanır.

Mənim mövqeyim aydındır: məktəb ilk növbədə elm, bilik və dünyəvi təhsil məkanıdır. Uşaqların dünyagörüşü formalaşan bu məkanda dövlətin müəyyən etdiyi təhsil qaydaları əsas götürülməlidir. Bu məsələni emosiyalarla, dini şüarlarla deyil, Azərbaycanın qanunları və milli maraqları çərçivəsində müzakirə etməliyik",-deyə o bildirib.

 Telli Pənahqızı Azərbaycanın daxili işlərinə qarışan qonşu ölkələrdən də danışıb.

"İranın da, Türkiyənin də öz daxili problemləri, öz təhsil siyasəti, öz qərarları var. Qoy hər dövlət ilk növbədə öz işinə baxsın. Azərbaycanla bağlı narahatlıq ifadə etmək istəyənlər isə unutmasınlar ki, narahatlıqla müdaxilə arasında ciddi fərq var.Biz heç kimdən icazə alaraq müstəqil olmamışıq ki, indi də öz qərarlarımızı kiminsə məsləhəti ilə verək. Azərbaycanın dövlət siyasətini Azərbaycan müəyyən edir, Azərbaycanın daxili məsələlərini Azərbaycan həll edir.Dostluq bərabərlikdir, ağıl öyrətmək yox. Qonşuluq hörmətdir, müdaxilə yox. Müstəqillik isə öz qərarını özün vermək haqqıdır!",-deyə T.Pənahqızı bildirib.

Jalə

Həmçinin oxuyun

İlham Əliyev Zirvə Görüşündə mühüm AÇIQLAMA ETDİ

Dünya şöhrətli bətəkardan  məktəbli forması ilə bağlı AÇIQLAMA  

Mərkəzi Bankın yeni tarifi kart köçürmələrini ucuzlaşdıracaq? — İqtisadçıdan AÇIQLAMA 

 Nazirlər Kabineti bu  məsələləri həll etsin  - PREZİDENTİN FƏRMANI