Deputatdan fermerlərə ŞAD XƏBƏR: Yeni imkanlar açılır

Azərbaycanda kənd təsərrüfatı, balıqçılıq və akvakultura sahələrinin inkişafında yeni mərhələ başlayır. Ölkədə daxili istehsal imkanlarının genişləndirilməsi və ərzaq təhlükəsizliyinin daha etibarlı təmin edilməsi məqsədilə “Kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı" təsdiq edilib. Sözügedən sənəd yaxın 5 ildə aqrar sektorda idxalın yerli istehsalla əvəzlənməsi və özünütəminetmə səviyyəsinin maksimuma çatdırılmasını əsas hədəf kimi qarşıya qoyur.

Mövzu ilə bağlı Oxu24.com-a açıqlama verən Milli Məclisin deputatı Zaur Şükürov ölkənin aqrar potensialını və özəl sektorun bu çağırışlara hazırlıq səviyyəsini şərh edib.

“İnnovativ texnologiyaların tətbiqi artıq seçim deyil, mütləq zərurətdir"

Deputat xatırladıb ki, Prezident İlham Əliyevin bu il mayın 25-də kənd təsərrüfatı məsələlərinə həsr olunmuş strateji müşavirədə irəli sürdüyü tezislər aqrar sektorun gələcək xəritəsini cızır. Onun sözlərinə görə, qlobal geosiyasi sarsıntılar və logistik xaos fonunda daxili bazarı qorumaq üçün modernləşmə qaçılmazdır:

“Bu gün dünyada baş verən iqlim dəyişiklikləri və ərzaq bazarlarındakı qeyri-sabitlik bizdən çevik addımlar tələb edir. Aqrar sahədə süni intellekt, peyk texnologiyaları və torpaqların elektron pasportlaşdırılması kimi sistemlərin tətbiqi artıq bir lüks deyil, zərurətdir. Bu rəqəmsal keçid həm torpaq və su resurslarımızın qorunmasına, həm də operativ idarəetməyə imkan verəcək".

Z.Şükürov parlament komitələrinin Kənd Təsərrüfatı Nazirliyi ilə birgə keçirdiyi dinləmələrə də toxunaraq bildirib ki, qanunvericilik orqanı da bu strateji hədəflərin institusional müstəvidə dəstəklənməsi üçün fəal iş aparır.

Real potensialımız hansı məhsullardadır?

Dövlət Proqramının ən mühüm istiqamətlərindən biri olan idxalın əvəzlənməsi prosesini qiymətləndirən deputat, Azərbaycanın bir sıra məhsul qrupları üzrə tam özünütəminetməyə keçid üçün real gücə malik olduğunu vurğulayıb. O, özəl sektorun bu fəaliyyətə cəlb edilməsinin vacibliyini qeyd edib:

“Xammal ixracından daha çox daxildə emal güclərinin artırılması, yerli şirkətlərin bu prosesdə rəqabətədavamlı məhsul istehsal etməsi prioritetdir. Regionlarda reallaşdırılan kommunikasiya, su və enerji layihələri sahibkarlar üçün əlverişli start meydançası rolunu oynayır.

Azərbaycanın özəl sektoru dövlətin təqdim etdiyi güzəştli kreditlər, subsidiyalar və aqrar sığorta mexanizmləri sayəsində idxalı əvəz edə biləcək layihələri icra etməyə tam hazırdır və bu potensial getdikcə stimullaşdırılır”.

Zaur Şükürov əlavə edib ki, aqrar islahatlar həm də ciddi sosial xarakter daşıyır. Kənd yerlərində biznes mühitinin stimullaşdırılması və kənd turizminin inkişafı paytaxta və böyük şəhərlərə olan demoqrafik təzyiqi (urbanizasiyanı) azaldır:

“Ərzaq təhlükəsizliyi təkcə iqtisadi göstərici deyil; bu, həm regional inkişaf, həm sosial sabitlik, həm də ekoloji balans deməkdir. Prezident İlham Əliyevin rəhbərliyi ilə icra olunan bu yeni strateji xətt ölkəmizin dayanıqlı inkişaf modelini daha da sarsılmaz edəcəkdir”,-deyə deputat fikrini tamamlayıb. 

Çimnaz Telmanqızı

Həmçinin oxuyun

 10-15° şaxta,intensiv yağış olacaq - XƏBƏRDARLIQ

Prezident İlham Əliyev də gedir:Möhtəşəm tədbirdən gözləntilər nədir? -DEPUTATLA MÜZAKİRƏ

Prezident İlham Əliyev başsağlığı verib 

Bakıda məşhur xəstəxana bağlanır