Tbilisiyə 81 manatlıq biletlər niyə əlçatmazdır? - SƏBƏB BİLİNDİ 

Azərbaycan Dəmir Yollarının (ADY) beynəlxalq reysləri üzrə 81 manatlıq biletlərin qısa müddətdə tükənməsi və sərnişinlərin bu kateqoriyadan yararlanmaqda çətinlik çəkməsi son günlər geniş müzakirələrə səbəb olub.

Vətəndaşlar ucuz biletlərin sistemdə faktiki olaraq əlçatmaz olduğunu, artan tələbat fonunda isə əlavə vaqonların qoşulmamasını narazılıqla qarşılayırlar. Mütəxəssislər isə hesab edirlər ki, yaranmış vəziyyət təkcə yüksək tələbatla deyil, həm də idarəetmə və planlaşdırma məsələləri ilə əlaqəli ola bilər.

Bəs 81 manatlıq biletlərin demək olar ki, yoxa çıxması və əlavə vaqonların qoşulmaması ADY-də idarəetmə problemlərinin göstəricisidirmi?

Cavanşir Abbaslı

mövzu ilə bağlı KONKRET.az-a danışan Ağ Partiya sözçüsü, siyasi şərhçi Cavanşir Abbaslı bildirib ki, 81 manatlıq biletlərin qiyməti müəyyən edilən zaman da ictimai narazılıq mövcud idi:

“Biletlər 81 manat civarında təyin ediləndə ciddi narazılıq yaranmışdı. O zaman da qeyd etmişdik ki, qiymətlər hədsiz dərəcədə bahadır. Hətta əvvəlki illərlə müqayisədə təxminən üç dəfə artım var. Sadəcə insanlar təyyarə biletlərinin qiymətlərinə o qədər öyrəşmişdilər ki, bu qiymət onlara münasib görünürdü. Halbuki biz həmin vaxt da bildirmişdik ki, tariflər kifayət qədər yüksəkdir”.

Siyasi şərhçinin sözlərinə görə, ucuz kateqoriyalı biletlərə böyük marağın olması onların qısa müddətdə tükənməsini qaçılmaz edir:

“81 manatlıq biletləri almaq üçün hər kəs müraciət edir. Nəticədə həmin biletlər sürətlə satılıb qurtarır. Bu, müəyyən mənada normal haldır. Bununla yanaşı, tələbatın qarşılanması üçün əlavə vaqonların qoşulması vacibdir”.

C.Abbaslı hesab edir ki, son dövrlərdə dəmir yolu nəqliyyatına marağın artması quru sərhədlərin bağlı qalması ilə də əlaqəlidir:

“Quru sərhədlər məsələsi aktuallığını qoruduğu üçün belə bir vəziyyət yaranıb. Bu addımların sərhədlərin açılması prosesinin uzanması ilə bağlı olduğunu düşünürük. Lakin istənilən halda dəmir yolunda yaşanan problemlərin əsas səbəblərindən biri idarəetmə məsələləridir. İllərdir bu problemlərin şahidi oluruq”.

O, vurğulayıb ki, əlavə vaqonların qoşulması və ya ucuz biletlərin sayının artırılması problemin köklü həlli hesab edilə bilməz:

“İndi əlavə vaqonlar qoşulsun və ya 81 manatlıq biletlərin sayı artırılsın, bu, ümumi mənzərəni dəyişməyəcək. ADY-də problemlər zaman-zaman özünü göstərib. Təəssüf ki, mövcud çətinliklərə baxmayaraq, qurumda idarəetmə sistemi hələ də arzuolunan səviyyədə deyil”.

Həmçinin oxuyun

Döyüş meydanında yeni ERA: PUA-lar və Elektron Müharibə sistemləri müharibələrin taleyini necə dəyişir?  

Azərbaycanda bu sahədə  yeni mərhələ başlayır —Prezidentin təsdiqlədiyi Qanun nələri dəyişəcək?

Leysanla bağlı XƏBƏRDARLIQ

Pensiyalarla bağlı RƏSMİ AÇIQLAMA