Keçid balları qalxacaq, yoxsa enəcək? – Mühüm AÇIQLAMA

CƏMİYYƏT

2762

18.06.2026, 23:10

Dövlət İmtahan Mərkəzi (DİM) tərəfindən 2 və 3-cü ixtisas qrupları üzrə keçirilən qəbul imtahanlarının nəticələri artıq rəsmən elan olunub. Bu xəbər həm abituriyentlər, həm də valideynlər arasında böyük həyəcan doğurub. İndi hər kəsi düşündürən tək bir sual var: Bu il keçid balları ötən illə müqayisədə necə dəyişəcək? Artım gözlənilir, yoxsa enmə?

Mövzu ilə bağlı Oxu24.com-a açıqlama verən tanınmış təhsil eksperti Elçin Əfəndi abituriyentlərin gələcək taleyini həll edəcək bu vacib məqamlara aydınlıq gətirib və mövcud mənzərəni təhlil edib.

“Hazırda konkret rəqəm demək tezdir, çünki qarşıda ikinci cəhd var"

Təhsil eksperti Elçin Əfəndi qeyd edib ki, hazırkı mərhələdə keçid balları ilə bağlı qəti və kəsərli proqnozlar vermək hələ çox tezdir. Buna əsas səbəb isə qarşıda abituriyentləri gözləyən növbəti şansdır:

“Hazırkı vəziyyətdə biz konkret olaraq ixtisasların keçid ballarının artacağını tam olaraq deyə bilmirik. Çünki qarşıda hələ ki ikinci cəhd qəbul imtahanları var. Məhz həmin imtahanlar başa çatdıqdan sonra, demək olar ki, bizi maraqlandıran bir çox suallara tam və real aydınlıq gələcək”.

İştirakçı sayı ballara necə təsir edəcək? Enmə və artım hansı ixtisaslarda olacaq?

Ekspert builki iştirakçı sayının dinamikasına da toxunub. O bildirib ki, imtahan verənlərin sayı ilə ötən illərin statistikası müqayisə edildikdə, bu amilin balların formalaşmasında mühüm rol oynayacağı görünür. Elçin Əfəndinin sözlərinə görə, bəzi sahələrdə balların enməsi qeydə alınsa da, populyar ixtisaslarda tam əksi müşahidə olunacaq:

“Mövcud vəziyyətdə iştirakçı sayının nisbətinə və plan yerlərinə əsasən, müəyyən ixtisaslar üzrə keçid ballarında aşağı düşmə (enmə) tendensiyası qeydə alına bilər. Elə ixtisaslar var ki, onlara tələbat hər il yüksək olur. Ekspert vurğulayır ki, həm II qrup, həm də III ixtisas qrupu üzrə reytinqli və prestijli ixtisaslarda keçid ballarının daha da artacağı gözlənilir”.

Son 10 ilin təcrübəsi nəyi göstərir? (İkinci cəhd faktoru)

Elçin Əfəndi açıqlamasında son onilliyin statistikasını xatırladaraq, ikinci cəhdin ümumi rəqabət mühitini tamamilə dəyişdiyini bildirib:

“Əsas vacib şərt ikinci cəhdin nəticələridir. Bizim son 10 ildə müşahidə etdiyimiz təcrübə və reallıq ondan ibarətdir ki, abituriyentlər birinci cəhdlə müqayisədə ikinci imtahanda öz nəticələrini əhəmiyyətli dərəcədə yaxşılaşdırırlar. Bilik və yığılan balların bu cür kütləvi şəkildə yaxşılaşması isə, istənilən halda, ümumi müsabiqə vəziyyətinə və rəqabətə birbaşa təsir göstərir. Nəticədə isə ümumi keçid ballarında ciddi artımlar qeydə alınır”.

Çimnaz Ağayeva

Həmçinin oxuyun