Sürücülük vəsiqələri ömürlük veriləcək? — AÇIQLAMA

CƏMİYYƏT

732

16.06.2026, 13:40

Dünyanın müxtəlif ölkələrində sürücülük vəsiqələrinin etibarlılıq müddəti ilə bağlı fərqli yanaşmalar mövcuddur. Bəzi ölkələrdə bu müddət daha uzun təyin edildiyi halda, digərlərində mütəmadi yenilənmə tələb olunur. Bu cür beynəlxalq təcrübələr zaman-zaman Azərbaycanda da sürücülük vəsiqələrinin ömürlük verilməsi məsələsini gündəmə gətirir. Bəs real sənədləşmə prosesi, texnoloji tələblər və təhlükəsizlik qaydaları fonunda gələcəkdə sürücülük vəsiqəsinin tamamilə ömürlük verilməsi nə dərəcədə mümkündür?

Mövzu ilə bağlı nəqliyyat məsələləri üzrə ekspert Raqif Raufoğlu Oxu24.com-a öz fikirlərini bölüşüb.

Ekspertin açıqlaması: "Sürücülük vəsiqəsi ömürlük ola bilməz"

Ekspert qeyd edir ki, sürücülük vəsiqəsinin tamamilə ömürlük verilməsi mexanizmi praktiki olaraq qeyri-mümkündür və bunun arxasında konkret obyektiv səbəblər dayanır:

“Ömürlük sürücülük vəsiqəsi olmur. Ölkələr arasında sadəcə il fərqi ola bilər — məsələn, bəzi yerlərdə bu müddət 15 il təyin edilə bilər. Hətta sənədin üzərində konkret müddət qoyulmayan ölkələrdə belə, sürücülər müəyyən vaxtdan bir müvafiq instansiyalara müraciət etməlidirlər”.

Raqif Raufoğlu vəsiqələrin mütəmadi olaraq dəyişdirilməsinin əsas səbəblərini bir neçə mühüm faktorla izah edir:

“Zaman keçdikcə insanların vizual görünüşü dəyişir. Sənəddəki fotoşəkilin real şəxslə uyğunluq təşkil etməsi üçün onun müəyyən dövrlərdə yenilənməsinə zərurət yaranır.

Müasir sürücülük vəsiqələrinin daxilinə biometrik və digər vacib məlumatlar inteqrasiya olunur. 10 il əvvəlki texnologiya ilə indiki texnologiya arasında böyük fərqlər var. Bu səbəbdən vəsiqəni bir dəfə götürüb, bir daha heç yerdə qeydiyyatdan keçməmək çaşdırıcı və qeyri-effektiv olardı. Bir çox xarici ölkələrdə müəyyən yaş qrupundan sonra sürücülərin sağlamlıq vəziyyəti xüsusi nəzarətə götürülür və sənəd yenilənərkən bu məlumatlar toplanılır”.

Azərbaycandakı mövcud vəziyyətə toxunan ekspert hazırda ölkəmizdə bu prosesin sürücülər üçün maksimum dərəcədə rahatlaşdırıldığını bildirib:

“Bizdə faktiki olaraq təkrar imtahan və ya sağlamlıq arayışı tələb olunmur. Sürücülük vəsiqəsinin 10 ildən bir yenilənməsi tələb olunur ki, bu da çox bəsit bir prosedurdur. “Asan xidmət” mərkəzlərinə müraciət etdikdə cəmi 5 dəqiqə ərzində sürücünün sadəcə şəkli çəkilir və vəsiqə yenilənərək təqdim olunur”.

Raqif Raufoğlu sonda əlavə edib ki, sənədin etibarlılıq müddətinin bitməsini gözləmədən də (məsələn, xaricə səfər edərkən yeni nəsil vəsiqəyə ehtiyac yarandıqda) “Asan xidmət” vasitəsilə sürücülük vəsiqəsini çox qısa müddətdə və rahatlıqla yeniləmək mümkündür. Digər ölkələrin təcrübəsində sağlamlıq və digər yoxlamalar daha ciddi xarakter daşısa da, Azərbaycanda bu proses həm sadə, həm də vətəndaşlar üçün tamamilə əlçatandır.

Çimnaz Telmanqızı

Həmçinin oxuyun