Nizami Kino Mərkəzindəki hadisə  nədən xəbər verir?  - MEMARLA MÜZAKİRƏ

Oxu24.com xəbər verir ki, ötən günlərdə paytaxtın simvollarından biri sayılan Nizami Kino Mərkəzinin binasına qarşı xoşagəlməz hərəkətlər edilib. Bir neçə şəxs gecə saatlarından istifadə edərək, tarixi binanın divarlarına müxtəlif rəngli boyalarla şəkillər çəkib və yazılar yazıblar. Şəhər sakinlərinin və turistlərin ən çox üz tutduğu məkanda törədilən bu əməl ciddi narazılığa və müzakirələrə səbəb olub.

Mövzu ilə bağlı Oxu24.com-a açıqlama verən memar Cahid Həsənov baş verənlərə və bu cür halların qarşısının alınması yollarına aydınlıq gətirib.

"Bu, maarifləndirmə boşluğudur"

Memar qeyd edib ki, əslində bu halı radikal şəkildə vandalizm adlandırmaq düzgün olmazdı, çünki əsas problem sistemli maarifləndirmənin olmamasındadır:

"Mən buna vandalizm deməzdim. Müxtəlif binalarda, şəhərin mərkəzində, xüsusi ornamentli tarixi binaların fasadında belə bir kütləvi hal müşahidə edilməyib. Lakin bu o demək deyil ki, biz buna göz yummalıyıq. Azərbaycanda açıq məkan reklamına nəzarət edən Dövlət Reklam Agentliyi 10 ildir fəaliyyətdədir. Bu qurum tərəfindən şəhər ərazisində ciddi maarifləndirici işlər görülməlidir. İnsanlara izah olunmalıdır ki, tarixi binaların divarlarına, darvazalara, şüşələrə yazı yazmaq, elan yapışdırmaq qəti qadağandır”.

Cahid Həsənov bildirib ki, qraffiti ilə məşğul olan gəncləri qınamaqla iş bitmir, onlara alternativ məkanlar təklif olunmalıdır:

“Bakının hər rayonunda gənc rəssamlar üçün xüsusi divarlar və zonalar ayrılmalıdır. Çünki bu sənət növü qapalı laboratoriya şəraitində inkişaf edə bilməz. Əgər belə məkanlar olsa, yeniyetmələr gəlib orada keyfiyyətli sosial reklamlar çəkər və öz işlərini dünyaya təqdim edərlər. Tarixi abidələr bərpa olunarkən onların orijinal layihəsinə toxunmaq olmaz. Bu mirası qorumaq üçün şəhərdə hər addımbaşı məlumatlandırıcı lövhələr və sosial çarxlar yayımlanmalıdır”.

Qeyd edək ki, sözügedən hadisə ilə bağlı artıq aidiyyatı qurumlar tərəfindən araşdırma aparılır və binanın ilkin görkəminin qaytarılması üçün tədbirlər görülür.

Çimnaz Telmanqızı

Həmçinin oxuyun

Bu şəxslərə maaş yeni qayda ilə VERİLƏCƏK 

SON DƏQİQƏ! Yüksək vəzifəyə təyinat oldu

Pensiyalar verildi

Deputatdan bu şəxslərin pensiyaları ilə  bağlı AÇIQLAMA: 6 aylıq maaş həcmində...