Cəmil Səfərov dəfn olunub  -FOTO+VİDEO

Azərbaycan mühəndislik elminin və metallurgiya sahəsinin tanınmış elm xadimi Cəmil Səfərov vəfat edib.

Oxu24.com  xəbər verir  ki,Azərbaycan mühəndislik elminin, metallurgiya və alüminium sənayesinin tanınmış elm xadimi, alim və pedaqoq Cəmil İldır oğlu Səfərov 9 yanvar 2026-cı il tarixində ailəsi və yaxınlarının iştirakı ilə dəfn olunub.

Cəmil Səfərov 23 oktyabr 1963-cü ildə Cəlilabad rayonunun Gülməmmədli kəndində anadan olmuş, 1986-cı ildə Azərbaycan Politexnik İnstitutunun (indiki AzTU) Maşınqayırma fakültəsini bitirmişdir. 1987-ci ildən aspirantura təhsili almış və 1992-ci ildə texnika elmləri namizədi dərəcəsi qazanmışdır. 2000-ci ildə Rusiya Federasiyasının Kursk Dövlət Texniki Universitetində doktorantura, 2018-ci ildə isə Azərbaycan Milli Aviasiya Akademiyasında texnika elmləri doktoru dərəcəsini almışdır.

Mərhum uzun illər Azərbaycan Texnologiya Universitetində professor, həmçinin “Azəralüminium” MMC-nin Gəncə İstehsalat Kompleksinin direktoru və müxtəlif ali təhsil müəssisələrində pedaqoji fəaliyyət göstərmişdir. O, həm elmi, həm pedaqoji, həm də istehsalat sahəsində göstərdiyi xidmətlərlə metallurgiya və mühəndislik elminin inkişafına əvəzsiz töhfələr vermişdir.

Cəmil Səfərovun elmi fəaliyyəti çərçivəsində 4 monoqrafiya, 13 dərslik, 7 ixtira və 150-dən çox elmi məqalə nəşr olunmuşdur; bunların 69-u beynəlxalq elmi jurnallarda, o cümlədən Rusiya, Fransa, Hindistan, Almaniya, İspaniya və digər ölkələrdə dərc edilmişdir. Onun elmi nailiyyətləri SCOPUS,Wos və Springer bazalarında indekslənmiş və sənaye tətbiqlərində geniş istifadə olunmuşdur.

Həmçinin oxuyun

Azərbaycanda iki bank bağlanacaq: Krediti OLANLARIN NƏZƏRİNƏ!

Prezident İlham Əliyev Azərbaycanın bu planını AÇIQLADI

Yeni ali dini liderin seçilməsi Azərbaycan–İran münasibətlərinə necə təsir edəcək? – Ekspertlər gizlinləri açıqladı  

Bu halda sürücüləri 2000 manat CƏRİMƏ GÖZLƏYİR

2021-ci ildə Türk Dünyası Araşdırmaları Beynəlxalq Elmlər Akademiyasının fəxri doktoru, 2024-cü ildə isə Azərbaycan Mühəndislik Akademiyasının prezidenti tərəfindən “İlin Mühəndisi” adına layiq görülmüş, 2025-ci ildə Türk Dünyası Araşdırmaları Beynəlxalq Elmlər Akademiyası tərəfindən “Türk Dünyası İlin Uğurlu Alimi” diplomu və “Şərəf” ordeni ilə təltif olunmuşdur. 2026-cı ildə Azərbaycan Mühəndislik Akademiyasının müxbir üzvü seçilmişdir.

Cəmil Səfərov həm elmi, həm pedaqoji, həm də istehsalat sahəsində göstərdiyi misilsiz xidmətlərlə Azərbaycan sənaye və elminin inkişafına əbədi iz buraxmışdır. Onun əziz xatirəsi Azərbaycan mühəndislik elmi və sənaye ictimaiyyəti tərəfindən daim ehtiramla yad ediləcəkdir.

Allah rəhmət eləsin! Məkanı cənnət olsun.

Nigarxanım