Zəhərlənib ölməkdən qurtulan 13 şanslı şəxs: İllərin müqayisəsi

CƏMİYYƏT

769

07.01.2026, 11:18

Kliniki Tibbi Mərkəzi 2025-ci ilin yekunlarına dair öz hesabatını təqdim edib və hesabatdan belə nəticə çıxıb ki, ötən il 32-si kişi 14-ü qadın olmaqla 46 nəfər zəhərlənmədən ölüb.

Oxu24.com xəbər verir ki, Mərkəzin Toksikologiya şöbəsi onu da vurğulayıb ki, 1188 nəfər zəhərlənmə ilə bağlı müraciət edib:” 495 nəfəri dərman preparatlarından, biri siçan dərmanından (rodentisid), biri həşərat dərmanından, 352 nəfəri isə sirkə turşusundan zəhərlənib.

Bununla yanaşı 8 nəfəri həlledici məhlullardan, 12 nəfəri yandırıcı məhlullardan, biri kimyəvi məhlullardan, 65-ü allergik reaksiyalardan, 40-ü fosfor üzvi birləşmələrindən, 18-i anafilaktik şokdan, 13-ü tüstüdən, 66-sı dəm qazından, 78-si ilan sancmasından, biri neft məhlulundan, beşi yabani bitkilərdən, altısı həşərat dişləməsindən, 22 nəfəri spirtli içkilərdən, dördü isə inqalyasion zəhərlənmə səbəbi ilə müalicəyə cəlb olunub”.

Bəs 2024-cü ildə bu göstərici necə idi?

2024-cü il ərzində zəhərlənmə səbəbilə Kliniki Tibbi Mərkəzin Toksikologiya şöbəsinə ümumilikdə 1835 nəfər qəbul qəbul edilib. Həkimlərin səylərinə baxmayaraq, zəhərlənən şəxslərdən 59-nun həyatını xilas etmək mümkün olmayıb.

Xatırladaq ki, zəhərlənmə hallarının artmasında kütləvi zəhərlənmələrin payı çoxdu. Ötən ilin son günü - Yeni il şənliyi zamanı Ucarda kütləvi zəhərlənmə halı qeydə alınıb. Belə ki, Ucar rayonunda yerləşən “Mercan Broiler” MMC-də təşkil olunan tədbir zamanı 14 nəfər zəhərlənmişdi.

Ötən ilin iyulunda Kürdəmir rayonunda kütləvi zəhərlənən şəxslərin sayı 24 nəfər olub. Sentyabrın 23-də isə İmişli rayonu Muradxanlı kəndi ərazisində yerləşən yaşayış evlərindən birinin həyətində keçirilən məclisdə iştirak etmiş şəxslərdən 55 nəfəri növbəti gün qida zəhərlənməsi şübhəsilə xəstəxanaya müraciət etməsi faktı ilə bağlı rayon prokurorluğunda araşdırma aparılıb.

Əntiqə Rəşid

Həmçinin oxuyun