Şöhrət var idi, imkan yox: ƏMƏKDAR ARTİSTİN ACI SONU

CƏMİYYƏT

1027

21.12.2025, 22:10

Kasıbçılıqdan nəşi yandırılan, atasına həsrət qalan əməkdar artist…

Söhbət Koroğlunun Nigarı, “Görüş” filminin pambıqçı Firəngizi olan Sona Aslanovadan gedir.

Oxu24.com xəbər verir ki, Sona Şahnəzər qızı Aslanova 1924-cü il oktyabrın 4-də Bakı şəhərində ziyalı ailəsinda anadan olub. Atası Şahnəzər kişi dövrün sayılıb-seçilən imkanlı insanlarından biri olub. Tanıdığı hər kəsə xeyir-şərdə əl tutan Şahnəzər kişi 1934-cü ildə bolşeviklər tərəfindən həbs olunub. Uzun müddət ailəsini görə bilməyib.

1952-ci ildə Azərbaycan Dövlət Konservatoriyasını bitirən Sona xanım opera və balet teatrında çalışmaqla yanaşı, həm də yenicə məzun olduğu sənət ocağında opera ifaçılığı sənətində dərs deməyə başlayıb.

Sona xanım 200-dən mahnı ifa edib. “Görüş”, “Anlamaq istəyirəm”, “Bizim Cəbiş müəllim”, “Bizim küçə”, “O qızı tapın”, “Ömrün səhifələri”, “Telefonçu qız” filmlərinə çəkilib.

Opera səhnəsində “Arşın mal alan”da Gülçöhrə, “Əsli Kərəm”də Əsli, “Koroğlu”da Nigar obrazını yaradıb.

1956-cı il noyabrın 6-da əməkdar artist adına layiq görülüb. 1959-cu ildə isə “Şərəf nişanı” ordeni ilə təltif olunub. Müğənninin qızıl fondda 50-dək səs yazısı var.

Aktrisaya ən böyük uğuru qazandıran 1955-ci ildə ekranlaşdırılan “Görüş” filmindəki pambıqçı Firəngiz obrazı olub.

Sona Aslanova İkinci Dünya Müharibəsinin iştirakçısı olmuş, vaxtilə İlahiyyat İnstitutunun direktoru olmuş Kamal adlı şəxslə tanış olur. Sona xanımın sənətinin pərəstişkarı olan Kamal maşınında daim sevdiyi qadının mahnılarına qulaq asırmış. Bir müddət sonra onlar ailə qururlar. Bu evlilikdə Cahangir və Rüfət adlı oğulları dünyaya gəlir.

1992-ci ildə Sona xanımın oğullarından biri ABŞ-yə köçür. Oğullarına hədsiz bağlı olan müğənni oğlunun ardıyca ailə üzvləri ilə birlikdə Amerikanın Los-Angeles şəhərinə köçür. Onun Azərbaycanla bütün əlaqəsi kəsilir. Ömrünün ahıl yaşlarında Sona Aslanova həyat yoldaşı ilə birlikdə yaşlı insanların yaşadığı, dövlət tərəfindən maliyyələşdirilən binaya köçür və orada yaşayır. Ömrünün sonlarına yaxın müğənni iflic keçirir və yataq xəstəsinə çevrilir.

9 mart 2011-ci ildə 87 yaşında dünyasını dəyişir. Ailəsinin onu Bakıya aparıb, orada dəfn etmək imkanı yox idi. Amerikada isə dəfn yeri almaq üçün 15-20 min dolları lazım idi.

Sona Aslanova ömrünün sonlarına yaxın ailə üzvlərinə vəsiyyət edir ki, onu yandırıb, külünü Sakit okeana səpsinlər. Lakin ailə üzvləri Azərbaycanda hara müraciət etsələr də, dəfn haqqında müsbət cavab ala bilmirlər. Belə olduğu halda ailə üzvləri Sona xanımın vəsiyyətinə əməl edərək onun meyidini yandırıb külünü isə Sakit okeana səpirlər.

Deyilənə görə Sona xanım bu vəsiyyəti ürəkdən etməmişdi…

Çimnaz Telmanqızı

Həmçinin oxuyun