Dahi necə olur? - Ulu Öndərin timsalında tarixi suala tarixlə CAVAB  

12 dekabr Azərbaycan yaddaşında bir günün təqvimə düşməsi deyil, bir epoxanın, bir iradənin, bir dövlətçilik fəlsəfəsinin xalqın nəfəsində yaşaması deməkdir. 

Bu tarix gələndə Azərbaycan sanki öz varlığının başlanğıcına qayıdır, öz möhkəmliyinin haradan gəldiyini, öz yolunun səbəbini daha dərindən dərk edir.

Ulu Öndər Heydər Əliyev adı bu xalq üçün sadəcə lider yox, dövlətin özüdür, doğulduğu torpağa xidmətin ən ali nümunəsidir.

Bu gün Azərbaycanın hər uğurunda,  hər yüksəliş anında onun uzaqgörənliyinin izi görünür. 

Buna görə 12 dekabr matəm səssizliyindən çox, bir millətin öz liderinə sonsuz ehtiramının günüdür.

Heydər Əlirza oğlu Əliyev 1923-cü il mayın 10-da Naxçıvanda anadan olub. 

1944-cü il¬dən təhlükəsizlik orqanları sistemində işləyib. 1964-cü ildən Azərbaycan SSR Nazirlər Soveti yanında Dövlət Təhlükəsizliyi Komitəsi sədrinin müavini, 1967-ci ildən sədri təyin olunub.

Ona general-mayor rütbəsi verilib. Leninqrad (indiki Sankt-Peterburq) şəhərində xüsusi ali təhsil alıb. 

1957-ci ildə Azərbaycan Dövlət Universitetinin tarix fakültəsini bitirib.  1969-cu il iyul plenumunda Azərbaycan Kommunist Partiyası Mərkəzi Komitəsinin birinci katibi seçilib. 

1982-ci ilin dekabrında SSRİ Nazirlər Soveti sədrinin birinci müavini vəzifəsinə təyin edilib. 

Bunlar böyük tarixi şəxsiyyət Heydər Əliyevin siyasi nüfuzunun nəticəsi, idarəetmə bacarığı, təşkilatçılıq qüdrəti idi.

Dahi Lider Heydər Əliyev 1969-cu ildə Azərbaycan KP MK-nın birinci katibi təyin olunandan az sonra Azərbaycan iqtisadi baxımdan inkişaf edib, ittifaqda fərqlənən respublikalardan biri olub. 

Rayonlarda mədəniyyət evləri, xəstəxanalar, klublar tikilib, elm, ədəbiyyat, incəsənət xadimlərinin abidələri ucaldılıb. 

Bakıda, eləcə də ayrı-ayrı rayonlarda böyük sənaye müəssisələri inşa edilib. 

Bakı Məişət Kondisionerləri zavodu, Radio zavod, Ozon zavodu və digərləri məhz Ümummilli Lider Heydər Əliyevin təşəbbüsü və təkidi ilə inşa edilib. 

Bunlar Azərbaycanda sənayenin dinamik inkişafı şəbəkəsinin bir hissəsi idi.

Ulu Öndər Heydər Əliyevin həyat yolu unikal idi. O, törədilən proseslərin içində yox, prosesləri idarə edən və yönləndirən, hadisələrin ardınca getməyən, onları özü yaradan lider idi.

 Sovet dövründə rəhbər kimi fəaliyyəti Azərbaycanın gələcəyini düşünən dövlət xadiminin fəaliyyətini xatırladır. 

O dövrdə milli kadrların yetişdirilməsi, Azərbaycan mədəniyyətinin qorunması, iqtisadi potensialın artırılması adi idarəçilik deyildi, bu, gələcək müstəqilliyin strateji hazırlığı idi.

 Hələ o illərdə onun gördüyü işlər bu gün daha aydın görünür. Əgər Azərbaycan o zaman inkişaf üçün təməl qazanmamış olsaydı, bu gün müstəqil dövlətin bu qədər güclü olması da mümkün olmazdı. O, gələcəyi zamanla deyil, milli yaddaşla ölçürdü.

Həmçinin oxuyun

Yeni təyinatlar baş tutub - Foto

Gələn ildən sərhədlər açılacaq - Deputat 

Töhmət alan deputat Rəfael Hüseynovla bağlı ŞOK DETALLAR:Özünü necə "yandırdı?"

Bakıda yaşayanların NƏZƏRİNƏ! Saat 10:00-dan etibarən...

1990-cı illərin əvvəllərində Azərbaycan tarixinin ən ağır dönəmləri yaşanırdı. Müstəqillik elan olunsa da, dövlətin özü çökürdü. Xaos, qeyri-sabitlik, parçalanma təhlükəsi, vətəndaş qarşıdurması və ümidsizlik ölkəni uçuruma aparırdı. 

Xalq bir sual qarşısında qalmışdı: Azərbaycanı kim xilas edəcək? Bu sualın cavabı artıq tarixdə öz yerini tutmuş bir şəxsiyyət idi – Ümummilli Lider Heydər Əliyev. 

Xalqın təkidli çağırışı ilə Bakıya qayıdışı təkcə siyasi qərar deyildi, bu, Azərbaycanın taleyinin dəyişdiyi an idi. 

O qayıdışla bir millət dərindən nəfəs aldı, güvən qazandı və öz dövlətini yenidən qurmağa başladı.

Ulu Öndər Heydər Əliyev 1993-cü ildən başlayaraq qısa zamanda dağılmış dövləti bir sistemə çevirdi. Sabitlik bərpa olundu, iqtisadi çöküş dayandırıldı, ordunun formalaşdırılması başladı, dövlət institutları yenidən quruldu, beynəlxalq əlaqələr gücləndirildi, Azərbaycanın yeni Konstitusiyası qəbul edildi. Ən əsası isə, Azərbaycanı dünyanın enerji xəritəsində önə çıxaran neft strategiyası formalaşdırıldı. Bu strategiya təkcə iqtisadiyatın inkişafı deyildi. Bu, müstəqil dövlətin siyasi dayaqlarının bərkiməsi idi. Bakı–Tbilisi–Ceyhan kimi layihələr bu gün Azərbaycan dövlətinin gücünü yalnız iqtisadi deyil, siyasi müstəvidə də qlobal aktora çevirən addımlardır.

Dahi şəxsiyyət Heydər Əliyev xalqı ilə arasında qəribə bir qüvvə yaradırdı. 

O, dövlət başçısı kimi yox, xalqın taleyini öz taleyi kimi yaşayan atalıq simvolu idi. Çıxışlarında sərt rəhbər qətiyyəti ilə müdrik insan səmimiyyəti birləşirdi. Onun hər cümləsində bir məsuliyyət, bir iradə, bir milli sevgi vardı. O deyirdi: “ Mən həyatımı yalnız və yalnız Azərbaycan xalqına həsr etmişəm.” Bu sözlər sadəcə bəyanat deyildi, həyatının mahiyyəti, varlığının təməli idi. O, hakimiyyətə gəlməyi yox, Azərbaycanı qorumağı, dövlət yaratmağı, milləti ayaqda saxlamağı düşünürdü.

Bu gün Azərbaycan dünya miqyasında sabitliyi, siyasi ağırlığı, iqtisadi gücü, diplomatik nüfuzu və regional liderliyi ilə tanınırsa, bu yüksəlişin bünövrəsi məhz Ümummilli Lider Heydər Əliyevin qurduğu sistem üzərindədir. Müasir dövlət idarəçiliyi onun müəyyən etdiyi modelin üzərində formalaşıb - sabitlik inkişafın şərti, dövlətçilik maraqları ali məqsəd, xalqın rifahı isə siyasətin əsas istiqamətidir. Onun yaratdığı ideoloji və siyasi məktəb bu gün də Azərbaycan dövlətinin aparıcı xəttini təşkil edir.

Bu böyük irsi davam etdirmək isə məsuliyyət idi. Cənab Prezident İlham Əliyev bu məsuliyyəti təkcə daşımadı, onu yeni zirvəyə qaldırdı. Onun 22 illik rəhbərliyi altında Azərbaycan Heydər Əliyev ideyalarının müasir mərhələsini yaşadı. İqtisadiyyatın dayanıqlı inkişafı, ordunun modernləşdirilməsi, diplomatik əlaqələrin genişlənməsi, ölkənin qlobal proseslərdə aktiv rol alması, regional layihələrin reallaşması və ən əsası - Azərbaycanın ərazi bütövlüyünün bərpası Ulu Öndərin qoyduğu irsin parlaq davamıdır. Bu, yalnız siyasi uğur deyil, tarixi ədalətin təmin olunması,  Heydər Əliyev arzularının gerçəkləşməsi idi.

Prezident İlham Əliyev dəfələrlə vurğulayıb ki, “Heydər Əliyevin timsalında biz əyani şəkildə görürük ki, şəxsiyyətlərin tarixdəki rolu bəzi hallarda əvəzolunmaz olur. Heydər Əliyev şəxsiyyəti, Heydər Əliyev dühası bugünkü Azərbaycanın uğurlu inkişafının təməlində dayanan bir amildir”. Onun fəaliyyətində Heydər Əliyev məktəbinin dəqiqliyi, ardıcıllığı və dövlətçilik məsuliyyəti özünü aydın göstərir. Cənab Prezidentin liderliyi ilə Azərbaycan təkcə regionda deyil, qlobal miqyasda söz sahibi olan ölkəyə çevrilib. Bu gün ölkənin diplomatik gücü, iqtisadi sabitliyi, enerji siyasəti, müstəqil mövqeyi və hərbi qüdrəti Ulu Öndər Heydər Əliyevin əsərinin yüksək mərhələyə çatdırılmış formasıdır.

12 dekabrda xalq yalnız Heydər Əliyevi anmır, o gün xalq öz dövlətinə, öz gücünə, öz yoluna da baxır. Bu günün mənasında dərin bir mesaj yaşayır, dövlət böyük Liderlərin çiynində yüksəlir, ancaq həmin liderlərin arzularını gerçəkləşdirən davamçılarla əbədiləşir. Ümummilli lider Heydər Əliyevin qurduğu Azərbaycan bu gün Prezident İlham Əliyevin rəhbərliyi altında daha da möhkəmlənmiş, daha da inkişaf etmiş, daha da güclənmişdir. Atanın yaratdığı əsər oğulun qətiyyəti ilə tamamlanmış, yeni mərhələyə yüksəlmişdir.

Ulu Öndər Heydər Əliyev xalqın yaddaşından silinməyəcək bir tarixi şəxsiyyətdir. O, bu torpaqda dövlət, inam, sabitlik, güc və gələcək yaratdı. Onun adı Azərbaycan adının ayrılmaz hissəsinə çevrilib. 12 dekabr isə bu böyük şəxsiyyətin qarşısında bir millətin ehtiramla baş əydiyi gündür. Bu gün onun irsi ilə yaşayan Azərbaycan var, onun ideyalarını gələcəyə daşıyan Prezidentimiz var, onun qoyduğu təməlin üzərində yüksələn güclü dövlət var. Bu ölkənin yolu onun adı ilə başlayıb, gücü onun ideyası ilə formalaşıb və gələcəyi onun yaratdığı məktəbin davamı kimi irəliləyir.

Azərbaycan Dövlət Pedaqoji Universitetinin müəllimi

Osman Azadoğlu

Xüsusi olaraq Oxu24.com üçün